母兼父職三兄弟冇王管<br>我未成年:陳豪12歲落D𠝹女

母兼父職三兄弟冇王管
我未成年:陳豪12歲落D𠝹女

陳豪自幼喪父,母親身兼父職,忙於賺錢養家,他們三兄弟變相冇王管,人細鬼大的他,日夜逛街玩樂,最離譜是他十二歲時竟自恃身材高大,夜蒲成人Disco追女仔,險誤入歧途。

下月十六日便三十五歲牛一的陳豪,形象健康,公餘時間不是到健身室做gym便是打網球,甚少夜蒲。其實陳豪不是不愛蒲,而是少年時早已蒲夠玩夠。

渴望成長蒲尖東

陳豪說:「十二歲嗰陣,爸爸已經過咗身,當時媽咪成日掛住做嘢搵食,我同兩個哥哥好似冇王管咁,成日走出街玩。嗰陣我好想快啲變大人,所以成日扮到成隻彩雀咁,同哥哥去尖沙嘴海濱公園、桌球室、機舖或者disco玩。當年disco有noonD,下晝時段專係畀後生仔玩,有時我都會恃住自己生得高大,個樣似夠十八歲,喺夜晚混水摸魚入去玩,不過一路玩一路驚,怕俾人識穿。」
經常到disco和桌球室流連,豈非容易誤交損友,未大先壞?陳豪笑道:「我係屬於得把口嗰種,學人扮cool扮大個之嘛!嗰陣成班男仔一齊,把口講到天花龍鳳話要點去追女仔,但都係齋talk,見到女仔個個就成隻鵪鶉咁,聲都唔敢聲!」

移民澳洲變乖仔

幸好這種蒲友生活只維持了一年多,陳豪十三歲那年,母親決定舉家移民澳洲,陳豪說:「如果留喺香港,繼續去埋啲龍蛇混雜嘅地方,真係分分鐘誤入歧途,變成嗰啲人㗎!去到澳洲之後,我啲時間忽然變得多咗,於是搵啲嘢學吓,後來仲識埋唔少鬼仔朋友,冇嘢做就約埋打波做運動,結果打打吓我就鍾意咗運動喇!」
採訪:戴彩煥 部份圖片提供:陳豪

《3歲–有難同當》
「每次我哋三兄弟其中兩個打交,媽咪就會一次過罰晒三個,佢話咁做係訓練我哋嘅團結精神喎!至於處罰方法,就係用皮帶打patpat,真係鞭鞭到肉!」
左起:大哥、二哥、陳豪

《4歲–哥哥走鬼》
「嗰日我同屋企人去兵頭花園(即香港動植物公園)玩,仲影低呢張相。嗰陣媽咪好鍾意要我同兩個哥哥着埋一式一樣嘅衫出街,但我同哥哥都好抗拒着到好似制服咁,冇晒個人風格。影相嗰陣我兩個哥哥都自動閃開,費事走埋一齊影咁尷尬!」

《5歲–校園喊包》
「呢張係我五歲嗰陣嘅幼稚園畢業相,我記得第一日返幼稚園已經喊到拆天,一味扯住媽咪件衫,唔肯畀佢離開半步,不過最後我都屈服喺糖果嘅誘惑之下,真係冇鬼用!」

《12歲–歲高大俊男》
「相中媽咪抱住嗰個BB係親戚啲小朋友,捉住BB隻手嗰個先係我,當年我只得十二、三歲,但已經生得好高大,話我十八歲真係分分鐘有人信,所以當年我就憑呢樣去disco見識吓!」

《29–歲長毛小生》
陳豪約於千禧年由大銀幕跳入公仔箱,憑着《妙手仁心II》飾演心臟科醫生林敏智漸為人熟識。加盟無綫之初,陳豪仍蓄長髮,充滿男性魅力。