祖國移動終於搞掂晒買人仔Peoples嘅手續，最最最開心嘅，應該係人仔個執行副主席、華華偶像「氣袋」梁啓雄！無他，六個手機台之中，人仔一向都屬弱勢社群，既冇3G牌，行頭又爭到頭崩額裂，咁一個屈尾十有人掟三十幾億將佢成個買起，又畀雄爺帶埋班靚──不論人鬼都全部留低，有錢落袋又有得繼續威，直頭要擺幾圍請食飯啦！
咁雄爺有幾開心？淨係睇佢噚日見記者時口水多過移動老總王建宙就知！雄爺話，好開心移動勁尊重佢哋，冇炒過一個人，嚮收購嚟講係好難得……（下刪500字）日後人仔條路點行？佢話以前未俾移動收購就孤寒地做，家陣有移動咁財雄勢大撐住，就可以……總之王總指示係，壯大之後只要唔影響其他五個台，有錢齊齊搵……（再刪多500字）而佢自己呢？總之唔收錢都做啦！你話佢係咪好High呢？