周迅同王菲老公李亞鵬分手後，佢就改投形象設計師李大齊嘅懷抱，內地有報道話佢哋上個月仲喺美國低調結咗婚，仲影咗婚紗相，因為擔心照片外洩，所以成件事都冚得幾密吓。
周迅一早就認定李大齊係佢嘅歸宿，佢新年嘅時候帶父母去咗美國，仲探訪李大齊嘅雙親，佢哋先後去咗紐約、三藩巿同洛杉磯，小情侶嘅父母初次見面都傾得好投契，雙方家長當然都好認同呢頭婚事啦，反而形式嘅嘢都係其次啦！
美國見家長
大前晚先由美國返咗台北嘅李媽媽，都接咗唔少親友打電話嚟問佢關於娶新抱嘅消息，李媽媽就話：「還沒有。」不過就承認有同周迅爸媽見過面。
周迅嘅經理人陶安華就話：「最近都有人問我小周（周迅）是否結了婚？」佢就例牌否認，仲話應該係李大齊幫人搞造型影相引起誤會。咁又係，周迅舊年十一月先至簽咗新經理人公司華誼兄弟，𠵱家搏殺期，咁快就話結婚，容乜易俾人當佢唔願做㗎！