1.獲取錄打強心針
朱英才一直不被嚴俊書接納，及至為公司解決一次危機後，嚴俊書終願意正式聘請英才。英才以為不獲錄用，還未睡醒卻接到老闆電話。在頭頭碰着黑的日子裏，成為她的一支強心針，讓人振奮。
2.呷乾醋二五疑雲
英才與公司員工出席宴會，會後在泳池邊遇舊男友產和，產和趁機與她懷緬舊情，二人看星星影相，被俊書撞見，心裏頓生點點醋意，後來因此認定英才是出賣公司的二五仔。
3.浪漫求婚眼濕濕
產和忍不住向英才再次求婚，在浪漫的環境下，英才感動得幾乎掉淚。二人共舞後，英才戴上產和送的戒指，默許婚事。
4.勇敢表白冧到爆
俊書得悉英才願意嫁給產和，醋意大發，要將英才抱走，與產和拉扯間，首次吐露情意，向英才表白，英才驚訝之餘亦喜出望外。後來俊書為醉酒的英才準備早餐，英才開心得擁抱他，二人正式拍拖。
5.為事業各奔前程
俊書達成夢想，獲意大利一公司聘請到當地擔任照明設計師，為期三年。本來英才答應同往，但出發當日卻改變主意，向俊書表示自己無法放棄事業，只好各行各路。
煲碟妹評語：有共鳴
好多韓劇都係以女人為主導，呢套《英才的全盛時代》算係輕鬆小品，起碼金玟善遇到嘅係一般事業女性都會遇到嘅問題，女劇迷睇完易有共鳴。比起阿信同大長今，都唔算苦命，加埋佢最終事業有起色，三十出頭就成為公司老闆，男友又對佢死心塌地，而且導演加插唔少笑料，我煲碟妹都睇得幾開心！
劇情：★★★娛樂性：★★★ 演員表現：★★★（編註：五粒★為滿分）＊此欄逢星期五刊出
衰女人改邪歸正
女主角金玟善99年參與首部電影《女高怪談第二個故事》，第一部擔正演出嘅劇集係《賢貞，我愛你》，佢曾經同安七炫合拍韓劇《愛情中毒》。
不過金玟善最為港人熟悉嘅就係喺韓劇《玻璃鞋》中，飾演虛榮心重嫉妒心強的衰女人宇承姬（圖左），今次佢喺《英》劇終於改邪歸正，飾演堅毅不屈嘅樂觀女孩。雖然金玟善喺劇中周旋喺兩男之間，但今年二十七歲嘅佢日前講到感情生活時只淡淡然話：「一切隨緣，我仲未有心理準備！」似乎好享受單身生活。
劉俊相大醋埕
而男主角劉俊相雖然唔算靚仔，但喺韓國都幾受歡迎。佢曾經同金賢珠合演《土地》，又同明世彬及李泰蘭合演《想結婚的女子》。今次佢喺《英》劇扮演醋埕太子爺，都演繹得唔錯㗎！