陳日君擢升樞機，噚日由羅馬直飛返香港，八方喺電視見佢老人家落機之後健步如飛，冇乜疲態，真係好嘢，莫非佢坐頭等機艙回來，所以咁fit？卻原來我哋呢位人民樞機不但只係坐普通經濟客位，而且國泰兩次主動提出要upgrade佢去坐商務同頭等，都被佢一一拒絕。
據有份去梵蒂岡觀禮嘅馬丁講，由羅馬直飛香港，大大話話要成十二個鐘，佢同家人因為停倫敦，時間更長，而對一個七十四歲嘅老人家嚟講，十幾個鐘唔易捱，但係陳樞機都唔肯接受國泰陳南祿佢哋喺上機前同上機後兩次同佢換更舒適位置嘅邀請，可見佢係一個真正嘅善牧者，堅持要同啲觀禮團人士一齊坐經濟客位，即係要同啲羊一齊，同甘共苦喎。
與陳日君同屬慈幼會嘅鄭家富就話，神父特別注重神貧，即係要生活喺廢鐵之中，盡量刻苦，唔好脫離群眾，咁先可以明白低下階層人士嘅苦況，懂得去照顧同幫助佢哋。
陳樞機屬於坐言起行、身體力行嘅人，馬丁話教宗本篤十六世嘅通諭係「天主是愛」，佢全都體現出嚟，好似佢幫冇證兒童安排學校讀書、幫爭取居港權人士、以至最近為韓農連夜站立喺觀塘法院門前，都為人所樂道，所以佢唔肯離開同行者係好自然嘅事。
馬丁或帶韓農去教堂
八方都記得當晚天氣好凍，陳日君一聽到有修女被扣喺觀塘法院，就堅持要入去搵人，企足幾個小時都唔肯走，亦唔肯坐低，嗰種堅毅不屈嘅精神真係叫人寫個「服」字。
正如八方講過，回港後陳樞機馬不停蹄，今晚七點半會有場彌撒，聽日五點半至七點喺明愛會有一個慶祝酒會。馬丁當然好想去出席彌撒，但係班韓農好客氣，係要請佢食飯，佢話可能帶埋班韓農去教堂，一齊慶祝就算數。
陳日君升做樞機之後，相信一定會有新動作，樞機為人咁刻己，不畏強權，不貪圖富貴，煲呔同北京真係冇晒佢符，煲呔今晚話咗會去出席彌撒，唔知陳日君會唔會以樞機嘅身份，再次叫佢同中央反映港人要加快民主嘅願望呢？
傳真︰2623-9278
電郵︰[email protected]