日籍租客一向有口皆碑，以致最多日本人聚居嘅鰂魚涌太古城，吸引一批穩陣派投資者支持，專吼日本客。不過，隨着西灣河嘉亨灣入伙之後，日籍租客唔再局限喺太古城，轉移陣地揀樓齡新好多，又有會所設施，兼夾距離太古城中心唔太遠嘅嘉亨灣。利嘉閣區域經理劉信文話，啱啱有個日籍教師，公司以月租3萬蚊，畀佢任揀單位，佢二話不說就揀咗嘉亨灣。
呢位日籍教師，以月租2.9萬租咗嘉亨灣6座低層C單位，面積1032呎，呎租28蚊，劉信文話，以咁嘅價錢，絕對可以租到面積大啲嘅太古城海景單位，不過教師嫌太古城太舊，又冇會所，寧願住細小小租嘉亨灣。業主舊年底以691萬買入，𠵱家以月租2.9萬租出，租金回報率超過5厘，以新樓計相當理想。