同謝偉俊講性，佢仲緊張過我，可能深知自己一向惹火，言談間偶有搶火位也是一閃即逝，深怕講多錯多，惟有講到莎朗史東《本能2》今日全球公映，想當年在《本能》裸露、冰插、無底蹺腳令幾許男士晚晚囉囉攣，以至續集的3P野戰，謝偉俊才能侃侃而談。當外國影評人激評48歲高齡的莎姐續集正面全裸令人不安；那邊廂謝偉俊卻跟我說年屆六十有餘的白姐姐（白韻琴）肌膚滑溜勝雪，那刻感覺確實令人悚然。
記者：陳慧茵 攝影：陳智良
性感內衣？唔使喇，對得耐，着乜都好似透明㗎啦！唔好搞咁多嘢，順其自然就得，成熟啲好，包容啲嘛。
白姐姐滑不溜手
約好在謝偉俊家訪問，白姐姐聲言不接受訪問，靜靜躺在沙發旁震震震玩OTO。Paul知我來意，直說剛收到《本能2》首映Invitation，順水推舟，大家由電影說起。
「第一集最經典一定係無着內褲蹺腳嗰場，引人遐想，對我而言，幻想重要過Visual，呢套戲夠Erotic！」48歲的莎朗史東仲吸唔吸引？「西方女性15-20歲最好，超過20歲就開始唔襟放，唔……比東方女性容易令人失望。」說罷望望身旁的白姐姐……
我硬着頭皮請白姐姐避席，怕的，是即時算賬，一向不愛談及與謝偉俊性關係的白姐姐邊說：「我聽唔到你哋講咩㗎！」邊靜靜離場。
20歲已經唔吸引，東方人、年屆62歲的白姐姐仲引唔引起到佢嘅性衝動？「嘩，衝動呢個字眼太強喇，我會話我哋關係仍然健康。」記得白姐姐從前接受訪問提過，與Paul分房瞓，是精神伴侶？「無咁嘅事，有誤會啫。」
「其實一齊17年，有吸引先可以咁耐，不過新會變舊，好多嘢變咗見怪不怪，不過白姐姐皮膚其實仲好滑不溜手，手感上仍然好得天獨厚。」然後，誠邀我訪問後親身驗證。
伴侶自慰唔覺Hurt！
謝偉俊肖狗，剛滿47歲，白姐姐比他年長15年，年齡差距下性需要差異自然大，「印象中我想佢唔想（做愛）嘅情況唔多，大家會盡量適應。」會唔會自慰？「自慰可以避免咗不必要嘅麻煩，夾硬搵對象分分鐘手尾仲長；有需要而Partner唔想，自慰OK㗎，解決到Tension、壓力，就算伴侶自慰我都唔會覺得Hurt！」
講起過去性伴侶，謝偉俊自言讀書時女友遍及澳、英、南斯拉夫、黎巴嫩、馬來西亞、日本，那麼他的性需要是否很強？「我認為性方面男人最Pride係19歲，然後就慢慢衰退，我遠離19歲好多年，生理上真係一天不如一天……」
揀斷背山唔上飛鵝山
本能續集比第一集更引人入性，其中原因還包括加插了3P（集體性交）（如無刪剪的話！）、車上野戰等場面，「中國人喺性方面好落後，其實呢樣嘢（3P）係人生體驗啫，大陸就話係刑事犯法，香港只要大家同意就無事，其實人有選擇權，性取向、幾多人做甚至用工具有咩問題？呢方面我幾欣賞外國人，佢哋重視情趣，用食物（作性工具）、甚至SM都無可厚非，中國人就普遍無咁adventure嘞。」
普遍民族心理搔不着癢處，只想知Paul夠不夠adventure？「哈哈，我接受到，不過無足夠機會同時間去培養呢個興趣！好似揸飛機、滑雪咁，年紀大先去學好易受傷嘛。」邊方面先？「方方面都係（笑笑口說）。」
「至於喺車上做就要小心啲嘞，話晒公眾地方犯法嘛；其實外國好平常，郊外地方成日有，我可以接受車上面，但唔係飛鵝山而係斷背山，飛鵝山排晒一架架車，十足時鐘酒店，點夠自在？」
成熟女人唔迫做前奏
訪問中謝偉俊幾次強調，「老」並非以年齡作準則，還包括心態及身體機能，我避諱不用「老」，只想知Paul對「成熟」女性的Expectation。「成熟女人性方面應該包容啲，即係少啲要求、埋怨同禁忌；要求即係做幾耐、咩地方做、前奏等等；埋怨即係嫌你前奏唔夠，有時間有氣氛可以畀多啲前奏，但作為條件之一，甚至話『唔做足前奏就唔好做愛』就唔應該囉；至於禁忌即係對口交、體位、甚至開唔開燈都要堅持，成熟女人應該會包容啲。」
夠膽如此說，我亦夠膽問：白姐姐達唔達標準？「咁白姐姐都有女士應有的成熟同寬容，哈哈。」
故事：朵朵薔薇在低唱，吟詠愛氣息……
莎姐衰扭擰
有數得計，莎姐92年拍《本能》已經三張幾，今時今日四十有八，中女一名，才首肯重拍續集，如果當日唔扭擰早啲拍，怕且未必有今日嘅慘痛比較。
床戲變車震
冰插都生誘
男主角換血
街坊：19歲哥仔拍心口撐
以為莎姐再下一城，現實港男必定狂踩，唔通真係要搵鬼睇？意外地訪問好壞參半，連年僅19的哥哥仔都話莎姐好吸引，拍心口入場支持；如果無口不對心，香港男士其實都幾念舊，幾可愛喎！
