講到迷你城市小車，最重要係在大街小巷泊車，法國佬呢方面好本事，車頭貼車尾咁泊，用盡每條街道，所以佢係新一代迷你小車，就以輕巧為主，1007車長兩米多少少，兩邊雙趟門，任你點窄，都方便泊車和上落車。
記者：陳偉林
攝影：伍慶泉
ImageGirl：Charlie
曾經以一款206車系在香港市場大賣的法國標致，生產小巧細車確有一手，正如擺在眼前的最新1007Sporty，1.6米身高的方匣子車，但經過有名的Pininfarina修飾，外觀沒有半點笨鈍的感覺，加上大型的鬼面罩同氣霸配襯，仲有醒目出神的高聚焦大燈及霧燈裝置，帶出一份小跑車氣息。然而，相信全車至盞鬼是兩旁闊落的電動雙趟門配搭，以單一按鍵操控開關，輕鬆又自在，跟一眾同級小車有很大不同。
Cameleo座艙多變又實用
外形包裝夠搶眼之外，呢部1007Sporty打開電趟門後的Cameleo（變色龍）座艙，原來前後兩排四個獨立座位，椅套連帶錶板冷氣出風口裝飾，還有門枕及後座儲物匣面板等18件飾物，係可以轉換其他顏色配襯，既新鮮又搶眼，好切合本身Cameleo的身份；其次，後排可覆摺以騰出更大的尾箱載物空間，兩排座位之間亦見闊落，方便出入。當中，筆者至欣賞是車頂前後雙天窗，仲有伸縮遮陽簾，視野廣闊，原廠恒溫冷氣還有高級音響配搭，置身其中有不錯的體驗同觀感。多個雜物箱裝置加埋前排椅背可作盛物盒組合，好切合一款多用途的城市小車需要！
半自動波箱加F1推桿至正
坦白講，為配合1007Sporty雙趟門配搭的緣故，車架作出了不少改動，例如加強了車頂和車尾的撞擊區，1007Sporty配以一台1.6公升直4引擎，輸出表現只係不過不失，無大驚喜；反而車內裝有一套短波棍式的5前速+/-半自動波箱，另加有軚環左右F1的轉檔推桿，令駕駛操控變得好玩又多Fun。車頂前方增設的魚眼式多角度後鏡配搭，對車廂四周的環境可謂一目了然；再者，由於車高的關係，呢部小車的轉向穩定性只屬一般，但勝在有齊高效能的四輪碟煞，又有ABS、EBD同EBA等主動安全系統輔助，加上全車前後共7個安全氣袋裝備，給予乘客十足的保護力。
新車評級
加速：C
以一台1.6公升直4DOHC引擎去驅動1,291kg淨車重看來，起跑同加速感表現不過不失。
轉向：C
從輪胎傳來的路面感弱，以一部小巧的城市車而言，勝在轉向反應輕盈不費吹灰之力。
制動：B
高效能的四輪碟煞制動器配搭，有ABS又有EBD同EBA等，令停車收放自若。
傳動：B
一套5前速+/-半自動波箱，另備有F1左右軚盤推桿轉檔組合，有賽車手的好玩又易操控。
舒適：A
全車前後四張獨立桶椅配搭，坐得貼服又夠承托力，連帶後排椅背亦一樣有角度調校。
耗油量：B
以廠方數據6.6L/100km約莫$0.85一公里計，之不過香港路面環境特殊結果未必咁理想。
車廂噪音：C
車廂的寧靜度表現評價算不俗，只係引擎在高轉下噪音略嫌偏高。
評分標準：
我們根據記者試車後的感覺給予評分，最好為A，最差為E。
供車計算機
車價：$186,800
首期：$18,680
利率：5.5%（以HirePurchase計算）
年期：4年
每月供款：$4,274×48期
牌費：$5,794
保險：$16,263（以0NCB計算）
標致1007Sporty規格
引擎：1587cc直4DOHC
馬力：110ps/5750rpm
扭力：15.0kgm/4000rpm
傳動：5前速+/-半自動波
售價：$186,800
車輛提供：法國汽車（31181828）