女人街：M到撇仔走光舞女無悔

女人HeaHea哋有乜好做？除咗行街shopping、唱K睇戲扮靚會boyfriend，呢班女仔會大大聲話你聽：「我哋要跳舞！」話佢哋係舞癡絕不為過，因為就算係有月事來、同男友鬧翻、被麻甩佬喪昅春光都在所不惜，因為大家都陶醉喺觀眾嘅目光中，究竟呢班舞女係一無所有定係一舞而得所有？
只管做愛做的事，懶理！

記者：周樺婷　攝影：何家亮

Stephanie（右）&Bernice：「我哋咁鍾意跳舞，扭動身體有鋪癮，唔郁就身痕！Nike舞動賽其中兩隊決賽隊伍，JumpOver同UniqueGirls仲連場激舞跳到落尖沙嘴，我哋實撐硬佢哋！」

JumpOver

成員：6個　成立：3年　主攻：hip-hop
「Jumpover」呢個隊名係佢哋嘅排舞老師Tommy改嘅，想佢哋不斷超越自己，愈跳愈好。佢哋不斷都有新人加入，玩過嘅比賽都有成十幾個。

隊長Benni
21歲
CityU學生

Erin
24歲
採購員

Winnie
21歲
文職

比比
20歲
樹仁學生

Ruby
22歲
旅行社職員

Mavis
23歲
文員

無錢都要跳

𠵱家嘅女仔好忙，返工返學又要拍拖，呢班女仔仲要跳舞，大家都想像到有幾harsh。平日一個星期排兩、三次舞，比賽前就更加要日日練，撞正OT放工9點幾，比賽前分分鐘排到深夜3、4點，第二日仲要返工，少啲決心都唔得。
除咗時間外，跳舞都需要唔少錢，bookstudio排舞、排舞師費用、比賽dressing、髮型、化妝等等，一個月開支都要過千。但佢哋有舞跳就無有怕，隊員比比話：「跳舞嘅滿足感唔係其他運動可以畀到我，融合咗sports同art、流汗嘅快感同音樂嘅藝術感，喺台上備受注目嘅一刻，乜都值番啦！」從比比口中聽到一套現代女性哲學，最緊要有信念，幾辛苦都值得。

M住跳痛少咗

身為女仔嘅小記最關心啲女人嘢，見佢哋日跳夜跳，好難撞唔到period嗰幾日，咁咪好煩？一問之下，其實好多都試過M住跳比賽，為咗靚，比賽裙仔通常都好短，搞到佢哋心驚膽跳，漏M好樣衰㗎嘛！
Benni剛剛先至親歷其景，佢話：「比賽M到最好用棉條，唔使驚移位就住就住，好多人以為放入去時會痛，其實係feel唔到嘅，真係唔使驚！」
另外一位成員Winnie就話：「其實M到時跳舞會加速血液循環，反而有舒緩作用，仲少咗M痛㖭。」又幾有科學根據咁喎，所以JumpOver話齋：「M到？跳舞啦！」

UniqueGirls

成員：4個　成立：1年多　主攻：breaking
4個女仔揚言要做「UniqueGirls」，憑跳舞跳出一片新天哋，其中阿Ling兼任隊長及排舞師，令佢哋嘅舞蹈更加有自家風格。

Dee
20歲
旅行社職員

隊長兼排舞師Ling
21歲
IVE學生

Dalki
19歲
旅行社職員

Libby
19歲
雜誌社parttime

為跳舞飛男友

跳舞花時間，自然少咗時間同朋友gathering，「UniqueGirls」四女都異口同聲話同跳舞圈外嘅朋友疏遠咗，慢慢就無咗聯絡。朋友都咁，demand更大嘅男朋友點算呢？
阿Dee前陣子就因為跳舞無時間陪男朋友，男方不滿，阿Dee又覺得男友唔體諒佢，結果分手收場。但係阿Dee一啲都無後悔：「分手唔多唔少都同冇時間陪佢有關，但我一定唔會放棄跳舞。」
隊員Libby就表示：「見過唔少case，如果對方唔係跳舞人，一般比較難keep得長。」所以，佢哋識男朋友都好自然搵番跳舞中人，咁就比較容易互相體諒。

有仔昅跳得仲High

小記見佢哋嘅舞衣都係小背心居多，跳舞時動作大，間中都會春光乍洩，怕唔怕惹來色迷迷嘅目光？她們亦直認不諱，由於喺文化中心外空地排舞，經常都有男途人圍觀，初時都會感到尷尬，好唔自然，後來多排幾次舞，發現男途人都只是齋昅無下文，慢慢就習慣了。
Dalki仲表示：「有人昅，我哋仲High啦！」其實只要跳得好、跳得靚先會有人圍住睇，作為表演藝術嘅表演者，有觀眾才有意思，又唔怪得佢哋俾人昅得咁興奮。

舞林高手　周日召集

睇到心郁郁，自己都想跳埋一份？「Nike舞動賽」決賽會喺一年一度嘅「Nike舞動派對」當晚舉行。除咗比賽外，參加者仲會同鄭融及廖碧兒一齊跳由國際排舞師JamieKing設計嘅NikeRockstarWorkout。派對上亦會介紹BodyCombat、集芭蕾舞和瑜伽的FloatNFlow等多種新式舞蹈，有興趣嘅朋友要多多留意喇。

Nike舞動派對2006
日期：4月2日
時間：2pm-6pm
地點：九龍灣國際展貿中心
網頁：www.nike.com.hk