不經不覺世嘉嘅《創造職業球會》系列已踏入十周年，適逢歐聯地位超然，廠方更將玩開嘅日本J-League進化到歐洲球隊，除此以外，連系統都參考埋街機足球卡Game《WCCF》，變得更多嘢玩，想嚟個細哨碧咸大混戰都唔再係夢想！
文：陳福榮
歐聯版《球會》以過往J-League版作為藍本開發。遊戲容許玩家選擇西班牙、英格蘭、德國、意大利、法國同荷蘭呢六個聯賽其中之一開波，再喺每個國家揀個城市作為球隊根據地。作為地方新進球會，要由丙組決勝戰作開端爭入乙組寶貴嘅席位。無論揀邊個國家，都會硬性規定甲、乙組分開打，必須運籌帷幄咁好好用錢同操Fit隊波，先有希望打上甲組同列強對壘。而由於只有荷甲、荷乙及西甲球隊係以實名出現，香港人較為熱衷嘅英超意甲就會變成假名，玩慣舊《Winning》嘅人應好快習慣。
冇錢萬萬不能
跟J-League版大致相同，佢喺球員甚至隊伍數據上做得相當仔細，每名選手都有優劣，只要練得其所，小腳色都可操得起！錢非萬能但冇錢就萬萬不能，經營都好講手底有冇足夠彈藥，打得好不但有可觀賣飛收益同獎金，就連向贊助商叫價都Easy啲，咁至可以搞多幾次海外遠征嚟操波。不過遊戲中就設有一名競爭對手，佢個款十足十暴發戶咁，出晒名擁有多支球隊幫佢「做嘢」，假如不幸地陷入經濟困難，就會俾佢全面收購GameOver收場，小心！
90分鐘比賽完全實況
實戰畫面都算係呢隻歐聯版《球會》最大變更，過去《球會》只係會喺關鍵場面先至播比賽片段，即係每場波呈現約十多次左右，假如發現屢攻不入就可以趁機作出調動或改戰術，不過嗰種互動就唔算好即時性。𠵱家佢將好多資源投放咗喺比賽上面，唔單止畫面做到好靚好有真實感，就連進行時間都係逐分逐秒咁去數，加上冇得選擇純玩數字嘅即時結果計算，換言之即係要睇晒成場波！亦因為咁比賽調動就顯得更加重要，有時換吓人畀吓壓力往往會有意想不到嘅效果。
試玩評語
今次《球會》可算係大刀闊斧變革之作，喺唔少地方都作出強化，而喺營運部份亦保留番上幾集嘅特色，畫面質素亦有提升，都算幾有心思嘅一集。不過就算佢喺呢幾方面點好，單係讀碟同比賽節奏已經要抦！唔知佢咩事要搞到個系統咁大負荷，每當轉換場面都要Load餐懵，眾所周知PS2讀碟已經唔係快，成日係咁Load好易搞死部機。另外比賽進行時亦唔係以往嘅精華片段，係要成場波咁去睇，就算校時間都唔快得好多，嘥鬼晒啲時間，令人好易冇Mood熄機走人。
巴治奧落場力撐
如果大家記性好，就應該仲記得上集PS2嘅《球會》係搵小野伸二做代言人，不過由於今集擺到明係玩歐聯，咁就當然要搵個更有份量嘅球星。於是廠方就特別邀請咗響日本極有名氣嘅意大利名將巴治奧，幫今集《球會》拍封面相兼上埋廣告，吸引力因此而大增。而且為咗紀念呢位剛退休嘅一代球王，隨Game更附送一張佢嘅《WCCF》特別版球員卡，雖然只係白卡但意思重大，有心人不妨拎去機舖操Fit吓佢啦！
PROFILE
遊戲類型：SLG
對應機種：PS2
遊玩人數：1人
售價：$398
(C)SegaCorporation2006
售賣點：DreamStore（25753285）
地址：灣仔東方188商場G04、256號舖
