童年時候的餅女吳雨霏（Kary）堪稱「鐵嘴雞」，經常駁嘴駁舌激嬲媽咪，加上天生喜歡說話，每朝早八點就開始咇哩吧啦，嘈到晚上瞓覺覺豬才收聲。試過一次吳媽媽被她激到生蝦咁跳，一怒之下將她趕出家門。結果Kary離家出走兩小時，最後由弟弟出馬帶她回家。
吳雨霏出生於小康之家，衰在「把口唔收」，她笑說：「我細個嗰陣係由起身嗰吓開始就不停講嘢，唯一唔講嘢就係瞓覺嘅時候。我朝早八點之後就開始咇哩吧啦，把聲又尖又高音，阿媽成日都話我好嘈，仲話我好難湊，因為我唔聽話囉，食飯鍾意周圍走，帶我去酒樓飲茶，次次都撩人傾偈。」
遭父揼落床
Kary除了愛說話，也經常頂撞父母，所以吳媽媽不時被她氣得頭頂冒煙。Kary說：「嗰陣我成日激親媽咪，把口冇時停，成日駁嘴，媽咪講一句我就駁一句。有次爹哋忍無可忍，一手抱起我揼落床，我即刻收聲，我驚佢揼我落街呀，嗰次真係好深刻。」
Kary續說：「又試過有一次，唔知點樣激親媽咪，俾媽咪趕我出門口，咁我咪死死地氣離家出走囉，嗰陣着住條睡裙同拖鞋，又唔敢走咁遠，落街就坐咗喺度，一路等有冇人落嚟搵番我上樓。等咗兩個幾鐘之後，細佬就着住睡袍同拖鞋落嚟搵我，叫我返上樓。
爭玩機械人
經此一役，Kary和弟弟就變得勁friend了，她說：「我哋以前經常打交，又成日玩槍、玩機械人，不過佢比我乖好多，嗰次之後我哋嘅感情係加深咗，我到十三、四歲嗰陣仲係同細佬一間房，我哋瞓碌架床嘅，後尾佢去咗加拿大讀書，我哋一樣好好感情。我比佢大兩年咋，我仲有個妹，我大佢十二年，𠵱家至得八歲，佢係mini版Kary，同我細個嗰陣個樣一樣，但佢冇我細個咁嘈囉。」
採訪：朱倬誼
部份相片提供：吳雨霏
