交行派出一份亮麗的全年成績表後，行長張建國噚日再同本地傳媒見面，進一步解說，唔知係咪盤數有交代，張行長個腦袋轉速都特別快，有記者問佢，四大國有銀行嘅中行及工行，加埋另一間中型銀行招商銀行，今年稍後陸續來港上市，交行規模唔夠四行大，靈活性又唔夠招行嚟，有乜競爭優勢？
好一個張建國，佢從容不迫咁回應話，換一個角度睇，交行規模比啲小銀行優勝，靈活性就好過大銀行，雖然唔係內地最早策劃上市嘅銀行，亦非最早股改重組嘅一間，但事實證明佢哋係首間上市而且仲取得成功㖭！又畀佢攞到彩！
曾經出任工行國際事務部總經理嘅張建國，當年有份策動工行收購友聯銀行（現稱中國工商銀行亞洲），係內地少數實幹型賓卡，簡布會上佢又多次話，交行內有唔少同事喺內地都稱得上係專家，但同香港等國際水平比，仍有唔少學習改進之處；真係幾謙。