伯南克終於順利完成佢第一次主持嘅聯邦公開市場委員會會議，結果一如市場所料，加息0.25%。全世界人最關心嘅，反而係之後佢嘅聲明，利世民噚日答應為各位讀者解畫，所以今日就嚟個伯南克思想大剖析。
伯南克未做聯儲局主席之前係一個學者，其中一個研究就係美國廿世紀初嘅大蕭條。伯南克認為當時出現經濟衰退，其實係因為聯儲局錯誤決定所致，佢認為如果當時聯儲局及時增加貨幣供應，就唔會搞到生靈塗炭。話說當時衰退加通縮，最慘情嘅係搵朝唔得晚嘅小債主，其實香港人經歷過建華八年，都應該明白到呢種情況有幾惡劣，唔需要利世民多花唇舌解釋。
儲局兩聲明要理解
伯南克最怕美國會再出現呢種現象。𠵱家美國房產泡沫已經明顯存在，大家亦明白伯南克怕通縮多過怕通脹，所以都估佢最多會加到5.25%左右。不過利世民要提醒大家，唔好睇小伯南克，因為呢位仁兄一早話過，佢要控制嘅係通脹，而佢嘅工具就唔單止議定利率咁簡單。
伯南克曾經話過，聯儲局有好多唔同嘅方法防止通縮，其中最「激」一招就係以發行美金支付政府開支而同時間減稅。美國財金界就係因為伯南克呢種主張，幫佢起咗個別號叫︰HelicopterBen。點解？其實呢個係經濟學界嘅一個比喻。佛利民曾經話過，中央銀行可以由直升機投擲鈔票，將貨幣供應量倍增，結果所有物品嘅價格即時上升，結果得益者︰朝唔得晚嘅小債主。
噚日聯儲局嘅聲明，大家要知嘅有兩點︰首先，佢哋對未來正面樂觀；第二，通脹壓力仍然存在，特別係油價帶動價格上升。咁即係點呢？首先，如果未來見能源價格繼續升而美國經濟又冇乜大礙，咁即係加息會持續，partygoeson。不過如果有乜依郁，見佢話要停止加息，咁就千祈唔好以為係好消息，因為呢個先係警號，到時就係大家見識HelicopterBen點樣以美元氾濫市場。
利世民