近來聽親都係喜事，有老有少，個個都話拉埋天窗。最新一單係糖王──唔係糖王自己，係佢位千金，外號「郭亞女」嘅《南華早報》最高負責人郭惠光（圖）準備出閣。
郭亞女蜜運嘅消息，八卦雜誌已經寫過唔少，八方聽聞最近有突破，在不久嘅將來郭鶴年會做外父，一對新人已經見過家長㖭。呢件喜事當然值得恭喜，更值得恭喜嘅係《南早》一大班員工。點解？第一，老闆女人逢喜事心情靚，一定唔會詐咁多型。更重要嘅係，傳聞郭亞女結婚之後，會休息番一年半載唔返工，留在家中專心煮公仔麵，你話幾咁令人雀躍呢！
講開《南早》，佢哋位鬼佬老總MarkClifford已經提前在本周一上班，佢將會帶埋位舊夥計入去管財經組。新人事登場，新作風拭目以待。
傳真︰2623-9278
電郵︰[email protected]