8號仔電盈噚日派成績表，最大驚喜絕對唔係盤數，而係李主席小小超卒之肯現身，事關二少佢經已3年冇喺業績會蒲頭。平時要見佢，好話唔好聽真係好似春秋二祭咁，一年得一兩次機會。
因乜噚日咁有興致？二少話，無乜特別原因，只係聽到好多報界朋友聲音，話大家有好多問題想問佢，所以咪出嚟囉……咁又係，間公司係佢嘅，得閒冇乜做情緒又到，咪蒲吓頭囉，又可以順便提醒大家邊個先係8號仔真正話事人，所以，應該係冇乜特別嘅！Bytheway，大家真係有好多問題想問，不過全部都係啲感情問題而唔係公事喎。
至於二少答唔答得晒報界朋友啲問題？梗係冇啦！尤其係最後尾中正佢死穴嗰條：「你係咪今年結婚呀？」佢直頭閃得快過侏羅紀啲速龍……其實二少又使乜咁驚青呢？正所謂男大當婚，加埋閣下仲係全東南亞最貴嗰件王老五，賣相又唔差，咁佢一日未親口講自己已經俾人私有化，大家都係會無休止咁追問落去，不如諗定個好啲嘅答案仲好啦。
兩鐵合併阿Jack冇份
業績會雖則有二少出場，但大家都唔會冷落8號仔另一靈魂人物阿Jack蘇澤光。噚日蘇生終於正式公布，佢話，由於二少話佢仲有好多嘢未做完，所以係會同佢再續三年約，而佢原則上經已同意咁話！咁即係，地底火車合併後個首領位冇佢份。
至於二少點評價蘇生呢幾年嘅表現？二少話阿Jack喺推出新產品新服務方面做得好好，只係有啲數字上嘅表現未夠理想……簡單講即係盤數同股價未夠滿意；咁有冇人工加？蘇生話出年年報咪睇到囉！嗱，二少不妨學吓嘢，下次再有人問閣下幾時結婚，個答案應該係「請飲嗰日你咪知囉！」
李華華
讀者如有任何意見或報料，歡迎發送電郵至[email protected]。