民主黨話要徹查反滲透問題，唔係淨係講過就算。佢哋個五人調查小組，原來已經傳召過達仔同張文光作證，內容梗係得佢哋幾個知，但至少證明小組係有做嘢，而且已經開咗工。
原來黨團召集人單仲偕原本前日都要被傳召，但最終逃過被問話嘅命運，一切都拜單太所賜。八方唔係話單太霸道得滯，唔肯畀佢老公出去做正經嘢，實際因為前晚係佢哋兩個嘅結婚二十周年紀念；二十周年喎，咁難得，同老婆慶祝梗係大過天，啲黨友一聽到單仲偕咁講，當然就速速放佢一馬，等佢可以同老婆sweetsweet一晚，至多就擇日再召見佢。
民主黨中常委今晚都會討論呢個問題，單仲偕唔係盛傳被中方滲透人士之一，原本可以置身事外，但始終都唔想見兄弟因為咁而拗大交㗎，所以佢好希望大家可以化干戈為玉帛，齊齊向前看，為區議會同立法會選舉做好準備。咁又係，面對公民黨咁大競爭，真係要自強不息先可以生存到㗎。
傳真︰2623-9278
電郵︰[email protected]