涂謹申年年預算案辯論，都會要求cut晒投訴警察課所有經費，因為呢個部門一啲都唔獨立，寧願cut咗佢好過。
長毛噚日喺立法會撐阿涂話，如果投訴警察課一早獨立，徐步高槍擊事件就唔會發生。
根據警監會嘅紀錄，徐步高俾人投訴咗五次咁多，如果有獨立調查，早就已經紀律處分咗徐步高，根本唔會發生槍擊事件啦。
阿涂就爆料話，投訴警察課嘅運作其實好黑暗，佢識個朋友做牙醫，有次唱K遇上差佬查牌查身份證，個牙醫叫個差佬禮貌啲，結果俾人拖咗出去打，打到牙都甩埋。
個牙醫好唔忿氣，就搵個做緊警司嘅大學同學投訴，但警司同牙醫講，佢頂多只係叫個差佬出嚟同你斟茶道歉，你去投訴警察課，盞俾佢玩番轉頭，冇用嘅。
講到咁慘，阿涂不如搵佢個牙醫朋友開記者會，話唔定輿論壓力，仲有效過喺立法會辯論，當然要佢個牙醫朋友肯先得。
傳真︰2623-9278
電郵︰[email protected]