期指今日結算，結算前配股消息特別多，加上美國利率上升周期未完，港股借勢挫111點。配股消息當中有堅有流。中移動（941）近日表現強勁，即傳出配股集資搞3G，但最後無下文。噚日傳中國人壽（2628）抽水，結果只是有股東沽9950萬股舊股，每股9.75-9.85元，套現不足10億元，照計對個市的實際影響唔會太大。
黑客話，市場比較關注國壽邊個係沽家，邊個係買家。市場傳聞滿天飛，一時傳李兆基是沽家，但一時又傳係佢接貨。有口痕友話今次配股，是國壽引入策略性投資者的前奏，有人憧憬係股神。
華瀚PE大落後
華瀚（587）最近表現大勇，唯高達唱好睇1.42元的報告見光後，噚日再升14.43%至1.11元。Cookie話，1.42元呢個目標價有啲啓示性，有機會上破此價，至於有冇其他好消息跟尾，就唔太清楚。華瀚業績算唔錯，中期賺6147.2萬元，增長21.3%，每股賺0.071元，唔派息。PE只有7.5倍，低於同業的平均15倍水平，是追落後之選。
晨訊（2000）大股東以每股3.49元減持1.15億股，噚日成交已上板，股份復牌後曾升4.7%至3.85元，收3.75元，升2%。黑客話，芬佬接貨後，好大機會繼續將股價推高，不過噚日大市陰晴不定，芬佬有啲窒手窒腳，所以升得唔多。
雅居樂（3382）被大摩垂青，出報告定其目標價8.10元，而且坐言起行入市掃貨，股價應聲彈高12%至6.45元，現價距離大摩目標價尚有26%上升空間。
雅居樂上市約3個月，但現價已較招股價3.30元累升近倍。照計短短3個月，內地的房地產市場變化應該唔係好大，究竟是雅居樂上市時被低估，定係市場過份睇好雅居樂？
阿虎