呢期最多人談論的數字是甚麼？當然是48，莎朗史東年屆四十有八仍瞓身演出《本能2》，邊個話呢個淨係男人嘅話題，今期36.24就要大做，做畀各位24至36歲嘅女人睇，等佢哋食靚啲着靚啲扮靚啲，第日唔會咁嚇人！
每個人都有自己找尋樂趣的方式，Joyce選擇「痛」。男一句：「我哋只係狂野啲，唔係性虐待。」女一句：「雖然滿身瘀痕，但我好Enjoy。」一個愛打一個願捱，原來性暴力不一定換來悲劇，反而令Joyce同Ben兩夫婦帶來樂趣。變態？Joyce對這兩個字很抗拒：「如果少數人做嘅嘢就係變態，咁飛車尋刺激，搵自己條命『教飛』嘅咪重變態？」
記者：馬慶武 攝影：周旭文
男上女下 好悶啫
曾通過電話簡單了解Joyce的「興趣」，見面當日沒有皮衫皮褲更沒有皮鞭，估不到愛刺激的Joyce，對着男記者談性事還有點害羞，面對面訪問時只說些皮毛事，較深入、較露骨的戲肉部份只是隔着電話敍述，像以下一段，「喺床上面，佢有時會用盡全力抓住我個胸，試過搞到我個胸清楚睇到佢五隻手指嘅瘀痕。但係做緊嗰陣我見佢咬牙切齒勁肉緊嘅表情，好似野獸一樣，好想好渴望摸我搞我，而我又會好興奮喎。」Joyce自稱是現代女性：「如果我唔覺得High，一定會鬧佢，唔畀佢咁玩。」Joyce話最High係老公從後進攻，一邊撞擊發出啪啪聲，一邊用手一下一下拍落佢臀部，事後紅紅腫腫赤赤痛更加係激戰後的最佳回味。Joyce也會主動出擊：「我興奮時都會𢱑佢背脊，玩完沖涼嗰陣，次次佢都痛到彈起，哈！哈！」性交時加入點點暴力，是Ben和Joyce結婚10年仍熱衷於性的原因。「結婚10年喇，次次男上女下？早啲瞓好過啦！」
「強姦遊戲」玩出火
愛尋刺激，玩厭過山車又想玩吓跳樓機，不斷尋求更高層次。Joyce和Ben都一樣，「起初只係做得肉緊時互咬對方，更激的一次係──佢撕爛我啲衫，連裙都唔除就推我趴喺枱，好似強姦咁。」Joyce說覺得這些是「遊戲」，擔心的是變本加厲，愈玩愈激：「咁我有時又會同佢癲，嗌吓『唔好！唔好！』佢又會好似獸性大發咁更加用力，我覺得咁幾好玩吖。不過自從有一次──佢又係喺後面嚟，但就向後扯住我隻手，搞到我成個人仰起，就係咁我扭傷咗個膊頭。之後大家傾過，講明要就住嚟做，唔想一時興奮整傷對方。」
用做愛嚟發洩
SM全寫為Sadomasochism，分別由虐待狂（Sadism）與被虐狂（Masochism）兩字組成；前者以侮辱、傷害或弄痛對方為主的性滿足者，後者以接受此等虐待為主的性滿足者。Ben、Joyce明顯可以對號入座，但兩人也極力否認，因為在他們眼中，皮鞭、蠟燭先代表玩SM，Joyce說：「我哋係喺床上面表現瘋狂啲啫，但我哋真係享受緊性愛。」性虐待個案很多時因為男方對女方有絕對佔有慾而構成，不過Joyce就好肯定地否定：「一定唔係囉，我哋大家都好少發對方脾氣，可能做愛就係最佳嘅發洩途徑。」
斯文野獸無分裂
平時無火，床上着晒火，Joyce話有時都覺得老公有少少性格分裂：「佢係工程師，平時着西裝返工，斯斯文文又唔食煙又唔講粗口，我諗無朋友估到佢喺床上表現好似野獸一樣。」Ben接受電話訪問時亦說：「我知，呢排興講性格分裂嘛！但係我唔覺得我係喎，好似有人日日喺寫字樓返工，但係興趣卻係打泰拳，你唔會話佢性格分裂㗎。」沒有標籤，亦沒有天生暴力狂，何時發現粗暴性行為才可得到滿分滿足？「唔，其實由拍拖到結婚頭幾年嘅性生活都好平淡，好多時工作壓力大，夜晚我都無心情做愛。可能大家都想維持番有正常性生活，所以為咗加添樂趣，我哋開始一齊睇AV。」
AV啟動粗暴性愛
直至有一次，「我哋喺廳度邊飲紅酒邊睇AV，片中出現粗暴鏡頭，可能飲到High晒，我膽粗粗問Joyce：『不如學吓佢哋咁囉！』Joyce無抗拒，咪開始咗第一次囉。」AV的女主角被手銬扣住雙手，現實中Ben同Joyce的第一次沒有手銬，Ben只用單手緊捉Joyce雙手，再用另一隻手盡情喺Joyce身上游走，挑起她的慾火，「我從來未聽過Joyce嗌得咁犀利，佢愈嗌得勁我就愈肉緊，嗰次整到Joyce手腕瘀咗，又成身都係咖喱雞，但係佢都無鬧我，做完之後淨係識得講：『好攰！』後來問番佢，佢都話嗰次好激，自此我哋做愛嘅方式就改變咗，平淡嘅性生活亦已成過去。」
原始獸性換來安全感
痛的不是他，他興奮，不難理解。那麼她的興奮，又從何而來？「女人可能都鍾意被人佔有，簡單嚟講做緊嗰一刻係好充實嘅，有時感覺到痛楚，但係唔及得興奮嘅感覺強烈，好多時做完愛後會覺得個胸有少少痛，但嗰一刻佢忍唔住我又無所謂，仲有少少覺得佢好Man㖭。加上佢咁野獸咁狂野嘅一面只有我一個睇到，一諗到呢度，我就好滿足。」Joyce說另類的性趣竟帶給她安全感：「佢鍾意咁粗暴，邊有其他女仔受得佢吖，咁我又Enjoy喎，佢都唔會再搵其他無『樂趣』嘅女人啦，所以我更加放心，佢一定唔會出去搞三搞四。」
周身瘀誤當被虐
不會出去搞三搞四的，又何只係男方。「我哋成日玩到周身瘀痕又指甲痕又咖喱雞，唔好話搞三搞四，游水都唔夠膽去。」Joyce說這「嗜好」也為他們帶來不便：「Ben就無乜所謂，佢話唔係太多指甲痕都會照去游水，但我就一定唔會，我唔係覺得呢件事唔啱，但係都唔想人哋以為我俾老公打。好似有一次去做婦科檢查，個醫生見到我身上有啲瘀痕，以為我俾人虐待，問我使唔使報警，又畀社工電話我，我解釋只係老公大力咗啲啫，個醫生仍擺出一副疑惑表情，我遇過最尷尬就係呢次。」
用道具才算變態？
執法者也可以變魔鬼，Ben同Joyce已玩出火，不怕玩火自焚嗎？「我信任佢，先肯俾佢咁粗暴對我，因為我深信佢唔會整傷我。嗰次我扭親手之後，佢同我講咗起碼十次對唔住，嗰個星期我咩家務都唔使做，其間我哋都好平常咁做，係我『撩』佢先做番狂野啲。」Joyce說大家會點到即止：「我哋唔會用道具，如果用皮鞭就真係變態喇，我都接受唔到！」估不到，粗暴性行為可以換來歡樂、換來信任！但說到最難理解的，便是他們弄得滿身瘀痕、指甲血痕，也不自覺是變態。
有痛就是SM
香港性教育促進會會長黎定基：「就算係幾咁輕微，從痛苦中搵快感都算係SM。其實輕微SM，意思係只對身體健康無影響，即係打吓PetPet，或者『搣』吓對方，又無使用道具的話，係可以接受嘅。但係雙方一定要有協議在先，如果覺得太痛亦應該出聲，因為只要女性身上出現瘀痕，已經有證據可以控告男方。最重要最重要係唔可以做出危害性命、或者身體健康嘅危險動作。」
興奮需要痛
臨床身心行為學家李寶能：「呻吟都係掙扎嘅一種，根本性興奮就必會伴隨輕度嘅痛苦。而且現代女性可能要求高咗，性關係又自由咗，呢啲都係令身體敏感度下降嘅因素，因為無咁敏感，自然需要更大刺激。每個人對痛楚嘅接受程度都唔一樣，最重要係對健康、懷孕無影響。另外呢個個案嘅男主角，你話佢喺床上表現好似另一個人，咁唔算性格分裂，因為正常性交係動物本能，喺許可嘅環境同對手下，正常性交時係唔需要用理性抑制。」
故事：艷紅、鮮紫，桃色薔薇掩映下，暗藏花之色……
