近排好多文化界有頭有面嘅人士都俾記者追問：「喂，政府有冇搵你入局？」即係話西九委員會名單有冇你份咁解。
我有個音樂界朋友同記者講話冇，點知個記者死跟住佢問：「係唔係政府搵咗你但係叫你唔好出聲呀？」我朋友話：「冇呀，冇搵過我呀。」跟住個記者重係問：「真係冇？」我朋友攞起個二胡講：「如果我講大話我以後都唔會拉二胡。」
其實佢唔係拉二胡而係玩古箏嘅。
不外乎係「平衡預算案」
𠵱家知道嘅係三個行政會議成員周梁、羅仲榮同張建東會分掌三個小組，另外進念嘅榮念曾、春天舞台嘅高志森、粵劇嘅周振基同旅遊嘅董耀中都有份俾政府請。
講真，份名單嘅人選冇乜新意。不外乎係「平衡預算案」等大家唔好嘈嘈閉。飲吓茶、食個包、傾吓偈、諮吓詢，搞掂。
何志平仲特登話未請地產界。梗係喇，想死咩？請得新鴻基長實咁信和會唔會嘈吖？請晒咁又會有人話官商勾結，咁梗係唔好制喇。
高志森同地產界有偈傾
睇番呢班人，高志森係最「人氣急升」嘅一個。嗱，橙皮書（表演藝術委員會份文件）有佢份，今次西九有佢份。一手軟件、一手硬件，睇嚟政府好睇起佢。佢重有一樣掂，就係同地產界有偈傾（春天舞台就簽咗其中一個財團）。所以記者下一個目標人物應該會係佢。
我覺得政府仲有幾類人要請入局，一類係又熟文化又熟教育嘅人，例如殷巧兒；一類係大眾傳播人，例如港台台長；一類係睇得通嘅人，例如中文大學嘅呂大樂。呂大樂喺《明報》寫過：「無論真心，還是假意，要重推『西九龍』，特區政府需要建構一套自圓其說的論述。」佢認為不談文化藝術內容，只談設施就只會令人擔心整個布局只是假借文化之名來發展地產。佢嘅睇法有見地。
不過我相信呂大樂根本就冇興趣入呢啲會。
觀火
傳真︰2623-9278
電郵︰[email protected]