美國加息，但亞太區股市升多過跌，港股跌得較重，「賴」咗加息不利樓市。今日期指結算，大戶鬥法，淡幫贏咗啲，可能係跌市更大原因。即月期指低水26點，下月期指則高水14點。過埋明日場外期指結算，下周踏入4月份，個市可能較為明朗，唔使太擔心。
恒指C輪2219：恒指上周低位係15619，𠵱家高過當時126點，估計有機會跌到接近上次低位，但唔會跌破。恒指如果再跌到一百幾十點，趁低買恒指C輪博反彈。
正路對象係2219，6月尾夠鐘，輪價17.4仙，溢價1.9%，槓桿率24.5倍（有效14.7倍），引伸波幅16.2%。按照公式計算，恒指每變動100點，隻輪升跌9%。
如果想買大市跌炒恒指P輪，則揀2299。隻輪7月底到期，輪價12.7仙，溢價4.8%，槓桿率25.8倍（有效11.7倍），引伸波幅18.6%。不過吼低位買C輪好過炒P輪。
建行C輪4548：交銀（3328）派成績表後市場收貨，建行（939）下周四派成績表都唔會水得去邊。有平C輪，可以執多少搵餐晏仔。
建行C輪高溢價嗰幾隻，制唔過。諗吓4548，7月下旬到期，輪價53仙，溢價0.6%，槓桿率6.8倍（有效5.6倍），引伸波幅30%。
章盛