慈幼仔鄭家富前晚由梵蒂岡趕回香港，因為噚日要開立法會就預算案投票。八方問阿富，此行有乜嘢收穫？
阿富話，今次七日六夜嘅觀禮團得益好大，既可成日見到教宗，又見證到陳日君擢升做樞機，而最大收穫係可以去到意大利都靈鮑思高神父行聖迹嘅地方。阿富於是講咗一個古仔，話大約喺一八四六年，鮑神父夢見聖母叫佢一定要喺都靈起一間教堂，呢位聖人當時只有一、兩蚊喺袋，但係就膽粗粗去做，最後搵人捐錢起咗座聖母進教之右大堂。呢件事令阿富有好大啟發，爭取香港民主本來見唔到出路，但係只要有「信德」，堅毅不拔，就有機會成功喎。
阿富回港，嫻姐今日就同屋企人飛去法國度假。呢段期間，法國嘅反惡法潮應該未平息，無理解僱呢家嘢，一直係工聯會最痛恨㗎啦，所以嫻姐都話，自己都好可能支援埋一份。
傳真︰2623-9278
電郵︰[email protected]