唱作人蔡國權○二年底喺東莞遇到交通意外，醫療費用龐大，佢個好朋友岑錦華（蛙爺）就號召一班好朋友喺文化中心搞咗個「群星滙聚關懷蔡國權金曲夜」幫佢籌醫藥費，前晚係最後一場，除咗譚詠麟（阿倫）同陳潔靈等係原先安排演出嘅歌手之外，徐小鳳同關淑怡都係臨時加入。
關淑怡獻飛吻
阿倫雖然啱啱喪父，近日忙於辦理父親嘅後事，但佢話應承過人哋嘅事一定要做，因為係佢爸爸教嘅，所以前晚佢都有嚟。譚老伯今日設靈，不過阿倫一早又應承咗出席雷頌德嗰個公益金音樂會，問阿倫會唔會取消唔去音樂會，佢都係嗰句：「應承咗人嘅嘢一定要做，上去唱都係半個鐘，唱完咪返去守夜囉，好近啫，唔去老竇仲唔開心。」
此外，平時行蹤飄忽嘅關淑怡，前晚就唱咗《患難見真情》一隻歌，不過佢冇喺台上講嘢，只係送個飛吻畀蔡國權啫。而小鳳姐大前晚突然出現，同蔡國權激動擁抱，之後兩個都哭成淚人，前晚小鳳姐仲大叫蔡國權加油，又話希望佢康復之後，第一首作嘅歌可以寫畀佢喎！
