事前以為今年預算案會有最多反對票，點知噚日結果就反轉晒，係得到最多支持票就真，真係唔知係唐唐出招成功扭轉敗局，抑或佢自己一直太過多疑呢？
不過，份預算案咁多支持票，都算為特區政府挽回少少面子，唔使俾人以為佢哋份預算案係小恩小惠。結果噚日休會期間，好多高官包括孫公、馬仔亨同周一嶽等都圍住D姐俞宗怡密密斟，有可能係諗緊點同唐唐慶祝，亦更有可能官員中陽盛陰衰，所以D姐變成最受大家歡迎，個個都鍾意圍住佢。
雖然預算案咁多票，但唐唐噚日笑容唔多，唔知係咪上個禮拜俾議員激親，道氣仲未落，所以塊面都緊繃繃咁，否則邊度有人執到金都唔識笑？再加上佢嘅得力助手袁莎妮即將去行政署做副署長，無咗個熟人喺身邊，唔多唔少有啲唔習慣啩，難怪唐唐都無乜笑容可言。
政府噚日宣布，前行政局成員鄭海泉會接替黃保欣，出任「香港特別行政區行政會議成員及立法會議員薪津獨立委員會」主席，公務員薪俸及服務條件常務委員會成員羅家駿做副主席，任期由今年四月一日至○八年三月三十一日，又一個叻人幫政府手，煲呔揀人真係一流。
傳真︰2623-9278
電郵︰[email protected]