噚日，孫柏文講過3月6日喺本欄為大家用隻金手指篤嘅投資建議，觸動到蘋果財經版兩位高手，分別係禮拜一同埋禮拜二，對小弟作出一啲提點。亦因我隻金手指感激無限，噚日，我喺本欄對王冠一兄喺佢禮拜一《國際視野》欄，題為《有姿勢無實際、點贏？》一文作咗啲回應，以報答提點之恩。
咁利世民兄喺佢禮拜二，《利字當頭》一欄，題為《姿勢和實際？》一文亦提點過小弟。小弟亦從佢文章中，特別係「姿勢上孫兄就笨拙少少」一句，得到很大嘅教訓。所以，好似噚日咁，孫柏文希望今日對世民兄嘅教訓，作一啲回應，以報答教訓之恩。
咁落力為保家衛國
𠵱家，我試吓總結世民兄對小弟嘅提點。故事起源，小弟3月6日篇文，題為《一注獨贏買白銀》，建議大家要強力買入實貨白銀，目標價為120美元一盎斯，目標價有效年期10年。咁世民兄對呢個建議，覺得最唔啱feel嘅係關於「目標價有效年期為10年呢樣嘢」。世民兄話：「十年投資目標？香港又有幾多人同你等得咁耐？孫兄如果想嚟個難度九點五分嘅動作，就不如同各位讀者分析吓三個月白銀價格，又或者話吓畀大家知今年底白銀見幾多都好。」
其實，短線炒作白銀唔係冇方法睇，只不過唔係好準。如果係準，孫柏文已經可以靠炒白銀孖展，發咗達。大家見到我仲未左擁右抱，就知道我未發達。如果真係要短炒，我覺得最好嘅參考工具，就係用白銀價50日同埋200日平均線。雖然我隻金手指，成日篤爆技術分析喺長線嚟講，一定係流嘢，不過如果真係要短炒，50日同埋200日平均線，係可以幫到你。今次大升浪，白銀現價每一次低過200日平均價，多過5%，都係一個冇死錯嘅入市價，而每一次白銀現價高50日平均價12%，都係一個好靚嘅短炒出貨價。𠵱家，白銀現價高50日平均價約11%，所以大家如果係短炒，就小心啲啊。
仲有，世民兄禮拜二亦問：「究竟金手指孫兄咁落力谷白銀為乜？」而世民兄嘅結論係：「唯一解釋，就係佢一心想出位，想多的人記得佢個大名囉！」其實，繼噚日為自己被指為「相信會有世界末日嘅悲觀者」闢謠之後，今日想澄清我唔係為咗「出位」而「咁落力谷白銀」。我「咁落力」叫大家買白銀，都只不過出於一份愛港愛國之心。因為，我覺得每個炎黃子孫，都應該肩負保家衛國嘅使命，所以，就「咁落力」叫大家買白銀。咁買白銀同愛港愛國又有乜關係？孫柏文他朝再分解。
孫柏文