證券分析師K嘅身裁一流，人人都話佢係證券界之中，身體最強健嘅。呢晚左丁山在飯局見到佢，眾人聽主人家講完業績分析及前景展望之後，注意力就放在分析K身上，要佢講解健身之道。
分析K話：「絕大部份人士要keepfit，最重要嘅目標就係減肚腩，縮腰圍，所以要以目標為本，唔需要舉啞鈴、擴胸肌。在座各位唔多唔少都有肚腩，要減除，好簡單啫，嗱，呢碟雞油花雕蒸蟹伊麵，雖然係一小碟，但大約有三百加路里，我就唔食嘞，各位得唔得？」左丁山第一個唔得，「海都」名菜，唔食呀，嘥啲喎！分析K講：「減肥要有定力，要有恒心！」跟住企喺身，伸個拳頭入褲頭，我哋嘩嘩聲，分析K笑笑口話：「我條褲係三十吋褲頭，現在腰圍收到二十八吋，好難買到新褲！」主人家大笑：「要去百貨公司童裝部至有！」
二十八吋腰圍，我輩真係遙不可及。分析K自有一套收身秘方，佢太太跟足做，生完又生之後，現在腰圍二十四吋，恨死其他媽咪。問佢有乜速成絕招，分析K話：「嗱，日日午餐只食一個大蘋果，飲幾杯綠茶（龍井），捱到第一個禮拜，以後就會習慣，加上朝早緩步跑十五分鐘，晚上再跑十五分鐘，一個月就會見效。記着要喺平地跑，穿跑步鞋防震。跑上斜路會傷心臟及膝頭，跑落斜路絕對傷膝頭，所以跑平地、平台最好。」
好多證券界老友鍾意打高爾夫球噃，可唔可以減肥呢？分析K嚡一聲：「打高爾夫邊度係運動吖，好似乜生物生（不便指名道姓）咁，成日打波，肚腩愈來愈肥，肥得滯，易有糖尿病，身體過重就令膝頭負荷增加，老啲就要動手術㗎嘞。」已有膝痛之人又點？分析K話如果係咁，唔好跑步，改為步行，日日行一小時，但係千祈記住美味食品唔好食咁多！