作為香港貿易發展局主席，吳光正（圖）都算係咁，佢每次接受傳媒訪問，都好落力推銷香港呢個國際商貿平台，叫人嚟港投資。
上周佢又飛到洛杉磯，向美國中小企業介紹香港、深圳同東莞呢個經濟圈，佢鼓勵美國商家：要入中國投資？請踏上香港呢塊跳板！
查實五年前嘅3月，吳光正都喺洛城有過類似演講，嗰陣香港回歸冇耐，人心不穩兼面臨金融危機後嘅蕭條。今次就唔同囉，單係演題──「變中國為機會」，睇都睇得出幾意氣風發。而且佢做足工夫，將「香港－深圳－東莞經貿圈」比喻為「三城故事」，又用最新數據解釋內地城市擴張、奢侈品市場與中產階級，以及大珠江三角洲的發展近況。
之後佢連美國太空總署（NASA）拍嘅中國衛星圖都出埋，話等大家睇吓呢三地的夜空有幾明亮、幾繁華喎，至於NASA啲衛星影到空氣污染嘅情況，佢當然唔會提啦。