西貢區住宅特別受外籍人士歡迎，點樣山卡罅嘅地方都有鬼佬捧場，又難怪嘅，全世界都好少地方好似香港咁，工廠區新樓都夠膽死包裝到酒店豪宅咁，舊區新樓又話係閃爍地標，落到街已成面塵，吸到嘅都係廢氣，班外國人見到咁嘅環境，試問點會唔鍾情於貼近大自然嘅西貢區吖。
世紀21區經理廖振雄話，西貢區每個月住宅成交中，外籍買家起碼佔三至四成，而且唔少高價成交都係由佢哋接手。
廖振雄話，啱啱有單清水灣兩塊田全幢村屋成交，同一時間由三位外籍人士爭奪，結果由澳洲漢以950萬元，擊敗英國佬同另一唔知咩籍嘅鬼佬，成功購入幢2100呎村屋，有1500呎大花園，望嘅係山景，十足澳洲老家嘅空曠幽靜感覺。
𠵱家西貢全區嘅全幢村屋，以最普遍嘅2100呎屋計，開價由500萬到2000幾萬都有，視乎地點、樓齡、景觀而定，不過，遇上不惜高價都肯搶貨嘅鬼佬客，就好難用市價計數。
電郵地址：[email protected]