講到5.1DVD影院組合，經過早年出機熱潮，不論功能、價錢已鬥到無可再鬥；今日介紹SONY新出的DAV-DZ120K，係筆者寫過最有睇頭嘅一部，特別之處係內置高檔機配備的「數碼自動調校」功能，跟機一個線咪加內置調校程式，可以全自動幫你調校好6隻喇叭達至最完美環迴立體聲效，加上SONY獨門S-Master放大器同850W總輸出，絕對係一級「爆炸品」！
記者：朱崇德
攝影：陳偉強
ImageGirl：Yuki
感覺SONY差不多成年冇出新5.1DVD影院組合，不過呢部DZ120K絕對係近年少見的精品；環視現今套裝機市場，新功能差不多玩無可玩、藍芽/紅外線無線喇叭都只係噱頭嘢（因為喇叭一樣要插電源線！）、鬥靚聲靚畫又太主觀兼抽象！今次DZ120K入門價強玩「數碼自動調校」，UserFriendly之餘又能谷盡部機12成功力，就算大家同級入門機相比，佢都標青啲吖；加上$2,480韓國機咁嘅價錢，殺死人咩！
3分鐘自動Set機
裝5.1影院最煩人處，就係要依着家居環境及喇叭擺放位置，再逐隻喇叭作調音。DZ120K係SONY首部內置數碼自動調校功能嘅DVD影院組合，跟機有專用感應咪，只要一經接上再擺在「王座」位置，就會逐隻喇叭發出「沙沙聲」試機聲效，並依着喇叭之間距離、水平和頻率作適度調校；實地測試呢套「自動裝機」系統相當迅速，3幾分鐘已搞掂，而且聲音定位相當準，最勁係筆者邊Tune機邊在後置揚聲器做訪問，感應器竟然分辨出喇叭聲效及環境雜音，並單一將喇叭頻率作適度調高！再加上SONY獨門S-Master「低失真」放大器同850W總輸出音量，以$2,480玩得咁Pro，真係相當抵！
12bit/108MHz靚畫質
畫質表現方面，都係SONY一貫細緻靚畫質，並與同系高檔影院組合看齊，行最高的12bit/108MHz視頻數碼/模擬轉換及「精確影院逐行掃描」；此外碟盤對應碟種超多，除一般DVD、DVD±R/RW、CD-R/RW、MP3、PictureCD外，佢連大家網上下載片的DivX格式，都可以用自燒光碟的形式擺在機內播放，不過影像輸出就只有色差、S-Video同視頻，獨欠LCDTV時下潮玩的HDMI數碼連接埠，實在有點不足；機身還另有卡拉OK功能，香港AV場Sales表示，本地客對呢樣功能可有可無，但國內市場就相當Buy，始終聊勝於無！
SONY查詢電話：23452966
鏡頭背後：
話說筆者早年推介個老死買套5.1影院，買後竟然媽聲四起；上去一睇！甚麼距離、頻率都冇Set，香港人通病
──買機唔睇說明書也！老實，將呢種自動感測Set機系統由高檔拉落平價入門機，真係造福機迷，而且入門客先至最需要呢樣技術嘛！
