超人同旋旋檔TOM仔，噚日正式同獅城報業大集團SPH簽字結盟。SPH用2.28億，買入TOM仔下面做廣告牌生意嗰間OMG三成半股權。以呢單刁嚟講，本來最令華華嘖嘖稱奇嘅，係OMG居然估值估到8億幾，而SPH又肯用成50倍PE入股；但去完個記者招待會，令華華大開眼界嘅，其實係坡佬嘅熱情！
話說SPH個CEO陳慶鏻，一開波就話，一生之中有三個Tommy對佢好重要，一個係TommyKoh許美通，即係嗰位舉世知名嘅新加坡外交家；另一個係TommyGoh，係佢當兵嗰陣嘅教官；最後一個呢，就係TommeiTong，即係𠵱家個partner、TOM仔一姐湯美娟！
阿陳生話，湯姐係佢一生中見過最charming（迷人）、成功、同埋談判技巧超卓嘅女人……台下湯姐冧爆，唔知嘅仲以為行緊婚禮！
之不過咁，阿陳生自己爆響口話，個刁其實喺舊年年中就開始傾，但嗰陣TOM仔嘅話事人仲係王兟阿兟哥仔，咁如果家陣仲係阿兟哥仔揸弗，唔知陳生會唔會改口，話佢嘅生命係俾「兟兟」照亮呢又？
李華華
讀者如有任何意見或報料，歡迎發送電郵至[email protected]。