世界盃六月開鑼，全球波友引頸以待，「搶錢機器」KONAMI當然唔會放過呢過黃金機會，距離上作未夠一年，已打破慣例宣布在4月尾趕出《Winning10》！要食世盃熱，梗唔少得Update吓球員轉會等資料，值得一讚係連剛打入世盃決賽周嘅安哥拉、千里達等球隊都首次粉墨登場，好多新面孔都玩得到！遊戲系統改良方面，加入更多假動作，如英格蘭名將經典嘅馬菲士假身，以及利用後前搓波作出嘅V形假動作，唔使玩嚟玩去都係施丹轉身咁悶啦！
至於由《Winnning8》已開始勁煲嘅MasterLeague，就將育成系統交由玩家決定是否啟動，若關閉嘅話，就唔會出現球員老化衰退等能力下降問題，毋須再將愛將忍痛賣畀人喇。
記者：徐影龍