《星島日報》噚日搞咗個傑出領袖選舉，好多財經界捧場，大會搵咗財經教父李業廣同馬會夏佳理幫手頒獎，近日傳聞話佢肯唔做證監主席，政府會搵馬會夏佳理做埋。不過佢兩個都冇回應。
唔少高官好似肥龍、唐唐、李少光、肥馬、孫公同李國章都有捧場，賭王千金何超瓊就着到靚靚，話晒何柱國有幫煲呔搞智經基金，點都要畀吓面，個個官都打晒煲呔，淨係得早走嘅唐唐打領呔，唔知係咪表明如果唔妥煲呔，下年都可以試吓揀佢呢？
有份攞獎嘅寶哥哥好風騷。公民黨喺東亞開籌款戶口，寶哥哥話唔清楚，佢只知余若薇老公胡健維醫生，係佢六舅父個仔，即係佢表弟啦！
上星期六落區出席諮詢會時被人圍咗兩個鐘嘅孫公噚晚都有同太太到高貴嘅君悅，今次到孫太俾人圍。唔使驚，圍佢嘅係記者，應該唔算刁民啩。記者行家只係想問孫太當日係咪好掛心啫。孫太笑笑口話，嗰日呢頭喺電視見到孫公俾人圍，呢頭電話就響，原來孫公驚咁嘅場面嚇親太座，所以打電話慰妻，叫佢唔使擔心喎。
星島老闆何柱國喺致辭時話，近日喺外國返香港，噚日睇報紙見到黎智英邀請教宗訪問中國，何老闆話好質疑肥佬何出此言，皆因只有屋主先至可以請人返屋企坐，佢問肥佬用乜身份請教宗去中國呢？
傳真︰2623-9278
電郵︰[email protected]
