呢幾日SONY都算幾多新聞，標誌着公司最大命脈一戰嘅Blu-ray制式，不斷公布更多詳細資料，不但Blu-ray光碟機，連PS3都有更多資料發布，而呢兩大類產品居然同樣在兼容性上大幅讓步，係咪暗示信心不足呢？
記者：徐影龍
踏入四月，SONY嘅Blu-ray產品正式出籠，由播放機、燒碟機到桌面電腦都有，即係嚟緊都見到Blu-ray瘋狂式宣傳！SONY自家正式嘅Blu-rayPlayer要到七月先見街，雖然賣價成八千蚊港紙，不過其兼容性之強，堪稱史無前例！唔計自家Blu-ray碟，仲支援埋DVD±/RW、MPEG2/4、AVC及VC1等制式（VCD嘅MPEG1尚未確定），試想像，配合燒錄平台，一隻50GBBlu-ray碟可收錄整整一套周星馳全集嘅MPEG4電影，收藏及播放上真係超級方便！最最最吸引影音發燒友嘅，係其1,080p超高解像輸出，其逐行掃描之影像威力，比目前主流嘅1,080i（隔行掃描）理論上勁一倍！八千蚊？發燒友話濕濕碎啦！
PS3不再分美日版
至於PS3，除如市場預計般延至11月發售外（有傳ToolsKit遲遲未交予開發商），最破天荒可算係遊戲不再分美、日版了！一向只有GameBoy、PSP等手提機不分美日版，𠵱家連PS3都行一Game過，對機迷講梗係正啦，以後日、英介面任你揀，真係謎題都易解啲（如《新鬼武者》）！但可見水貨問題將相當嚴重，直接影響行貨售價，除非真係做到全球同步出Game啦！