經紀黃今次又開口中，中國網絡（383）揸住嘅7.99％天安中國（028）股份，當真被人買咗，雖然每股只係3.68元，同前日市價有兩成折讓，但就無損隻股的升勢。
原來有間日資財務機構話已經揸咗10％天安股權，消息刺激天安股價再升13.83％，收5.35元。經紀黃話，家陣大陸地產股隻隻都炒到㷫烚烚，所以有人調升對天安的目標價。
除咗天安外，經紀黃話可以睇吓size較細的中新集團（563），隻股早前以0.89元配股後出現調整，但芬佬一路收集，昨日終於重返配股之前的1元水平，成交亦明顯大咗好多。
經紀黃話，由於大陸地產股幾乎全部升晒，芬佬惟有搵更冷門的同類股嚟炒，雖然中新現時每股資產淨值只得0.231元，但因為先前做咗一系列注資，如果將項目重新估值，計落條數會唔同。
中新昨日升2％，收市報1元，成交股數4859萬股，金額4903萬元。
慕容小初