期指明日結算，港股昨日忽上忽落。恒指升過105點，又跌過28點，埋單則有40點進賬。即市炒輪好難賺錢，追勢派做嘢，高價追貨低價投降，做得唔好，1日輸幾鋪。
恒指有得升，靠隻中移動（941）向上移動1.40元，扯高86點。有人推測大戶踢高中移動，係為咗期指結算殺淡友。如果真係要造高指數，點解又唔踢埋滙控（005）上去？滙控收129.90元，唔見0.50元，係除息5日以來首次低過130元齊頭價。
中石化C輪2206：石化股近日唔多得，連中石化（386）亦都向下郁，收4.55元，跌0.15元。中石化本周五派成績表，盤數出嚟見人前估計仲會軟軟哋，吼住回到4.40元，低位買C輪博反彈。
中石化C輪正路之選係2206，6月尾夠鐘，輪價51仙，溢價1.9%，槓桿率8.9倍（有效6.6倍），引伸波幅32.6%。如果正股唔跌，則無謂追C輪。
中石油C輪4974：中石油（857）穩定過其他兩隻同類股，收8元，微跌1格，C輪有得諗。
正路之選係4974，10月底到期，輪價98仙，溢價4.5%，槓桿率8.2倍（有效5.2倍），引伸波幅32.2%。如果唔計較交投稍靜，2269都唔錯，係另一個選擇。
章盛