杜汶澤同吳君如之前因為主持一個電台節目而成為好朋友，但𠵱家就佢老婆田蕊妮同君如一齊開咪，近日有雜誌寫話杜汶澤因為田蕊妮成日喺電台俾君如窒而同君如反目，重咒君如「生仔冇屎忽」。阿澤噚日喺電話回應話：「我已經透過經理人正式向演藝人協會投訴，同時公司亦安排我見律師諮詢意見，呢件事我會追究到底，我同君如嘅關係，唔需要向外界披露同解釋，我最憤怒嘅，係講到BB仔嘅嘢，我真係接受唔到，屈我乜嘢都得，唔好攞BB嚟講，真係太過份！」
醉酒戲被投訴
而阿澤接受電台訪問時就話正常人點憎對方，都唔會詛咒人哋嘅BB，唔知本雜誌有乜居心。佢強調同君如依舊友好，亦唔會過問太太田蕊妮工作。而吳君如就回應話佢同阿澤嘅友情唔需要同公眾交代，亦唔會俾雜誌影響到。
其實阿澤如果阿Q啲睇，咪當呢單新聞係幫佢套下周四上映嘅《伊莎貝拉》宣傳囉，戲中有一場喺澳門拍嘅醉酒戲，梁洛施要向杜汶澤爆樽，拍嗰陣係深夜，結果俾當地居民投訴，而Isabella由於未夠十八歲，所以要飲一啲左溝右溝嘅嘢代替啤酒，仲要嘔出糊狀嘅餅碎做嘔吐物，認真核突。