李彩華（Rain）前晚連走兩場，她出席完時裝騷，再換上一條吊帶裙赴首映禮，現場所見，Rain的上圍突然豐滿不少，並展現出一條深深的乳溝，不過卻有黑色的陰影，未知是否靠人手加工，令上圍顯得更加突出。
李彩華前晚與陳小春等演員出席在觀塘舉行的《打雀英雄傳》首映禮，Rain以一襲DKNY吊帶裙勁晒乳溝，被問及上圍為何突然變得如此犀利？她笑說：「唔係我勁咗，係揀衫問題，呢條裙我上次着過去上海萬寶龍嘅活動，不過今次唔同色啫，我𠵱家身材OK，但揀衫適合會更加OK。」
自稱純天然
忽然升cup，乳溝更有明顯的黑色陰影，Rain卻否認是後天加工而成，她說：「係natural，點加工呀？」至於近來頻頻以性感打扮出席活動，問到Rain可有獲得男友蕭定一、公司同家人批准呢？她迴避說：「公司OK，林太（林小明太太）成日話我咁着靚，纖體瘦身後對自己有信心，以前肥肥哋有啲肉好醜樣，唔夠膽咁着，𠵱家滿意自己嘅身材，咁着好正常。」
首映禮前，Rain先到中環出席時裝品牌MaxMara活動，更獲前緋聞男友丁子高熱情招待。李彩華以露背裝及短褲上陣，大騷玉背及美腿，她說：「唔係好性感啫，夏日炎炎，女仔係咁着㗎啦，不過置裝費都幾貴，上季冬天用咗六位數字。」
自比容祖兒
Rain愈講愈興奮，更忘形地說：「我今年同時裝真係離唔開，好多活動出席，以前自己塊面圓啲、腳又粗少少，𠵱家瘦咗着衫好睇好多，我希望今年可以得到最佳衣着獎啦！」當記者質疑她資歷尚淺時，Rain卻說：「Joey（容祖兒）都攞咗啦，咁大家都係對時裝有興趣啫！」
此外，小春在前晚睇完首映後，八時多偕數名工作人員到中環九記牛腩，大歎馳名牛腩麵，不過他發現有記者在場時，即時加料變牛腩黑面，有記者上前問他會到哪兒開工拍戲時？他不予理睬，還叼牙籤，露出不屑表情，接着才冷着面登上保母車。
採訪：張俊銘、梁錦雯
攝影：林德雄、陳偉權、娛樂突發組
