浸會大學今年慶祝五十周年校慶，舉辦一連串活動，今年年尾喺會展中心舉行盛大宴會，將活動推上高潮，至於啲熱身活動，已陸續展開，上星期六（三月二十五日）便在老地方——何善衡校園——之昔年籃球場舉行校友盆菜宴，並向畢業二十五年之校友贈送紀念牌。
土木Ｇ畢業於土木工程系，雖然該年呢個學系已俾謝志偉校長殺咗，佢哋好多土木系校友心懷不忿，對謝校長冇乜好感，但畢竟係母校校慶，母校有栽培之恩，土木Ｇ今日係大型建築公司土木工程主管，飲水思源，仍然報名參加校友盆菜宴。當日星期六天不造美，中午時分落雨不停，而盆菜宴在露天地方舉行，令土木Ｇ好擔心。好彩主耶穌幫忙，晚上七點半開始就冇雨落，土木Ｇ與同學用紙巾抹乾張櫈，着住校方派發嘅透明膠雨褸，仍然可以敍舊一番，至於濕濕地嘅盆菜好唔好食，土木Ｇ話不便置評。
謝志偉大概離校太久，當今之年輕人又唔鍾意讀歷史，是晚應邀出席，返到校園，竟然冇人認得，土木Ｇ雖然一世都記得佢殺咗土木工程系，但老校長駕到，要尊重老人家啫，急忙對接待人員講：「快啲招呼謝志偉博士啦！」哈，有人同佢講：「謝志偉係乜人呀？」唉，既唔認得，又唔識得佢係老校長，都唔知係邊個嘅錯，唯有話錯在社會啦。
謝志偉口才極佳，致詞時聲音響亮，有人問佢點解咁大聲，佢話：「浸大有中醫學院，發展靈芝產品，我食咗，身體壯健，聲音更響亮。」（大意如此），其實浸大中醫學院係佢極力爭取成立嘅，即係讚番自己，老人家之頭腦咁靈活，唔通真係靈芝嘅功勞？
講起新一代唔識老人家，公關大姐大最唔接受新人嘅解釋：「法蘭仙納杜拉點知係邊個呀，都唔係呢代嘅！」大姐大認為年輕人要有好奇心，對各行各業嘅頂尖著名人物，都要略知一二，唔好搵藉口，樣樣姓賴，無論打工或創業都難有好前途。