嘩！孫柏文今次真係受寵若驚，近期小弟嘅名，喺本欄隔籬左右，前前後後，曝光率奇高。有人話過，呢個世界係冇分正面宣傳，或者負面宣傳，所以見到人哋講孫柏文，我就感受到一剎那嘅非理性亢奮。人氣急升原因，都係多得3月6日小弟喺本欄為大家用隻金手指篤嘅投資建議。嗰日，小弟篇文題為《一注獨贏買白銀》，建議大家要強力買入實貨白銀，目標價為120美元一盎斯，目標價有效年期10年。當日，白銀現價為10美元。當日小弟又講過，每一次白銀創新高，我都會出嚟邀功；每一次跌，我都會叫大家「趁低吸納」。
對沖「世界末日」風險
咁喺上個禮拜五，見到白銀創22年新高，我就出咗嚟幫我隻金手指邀功。點知，觸動到蘋果財經版兩位高手，呢兩日出嚟提點我呢一個乳臭未亁嘅新晉財經口水佬。首先係，我心目中德高望重嘅王冠一兄，喺佢禮拜一嘅《國際視野》，題為《有姿勢無實際、點贏？》一文，提出咗一啲令小弟有好多啓發嘅提點，所以，今日我會作一啲回應，以作報答提點之恩。第二日就到隔籬利世民兄，我明天會回應。
𠵱家，我試吓總結冠一兄對小弟嘅提點。冠一兄最擔心嘅係，「盎斯銀價假如去到120美元，你估會是個甚麼世界？…世界末日囉！」。好彩，隻金手指可以向冠一兄講一句：「Ifeelyourpain,butdon'tworry」。首先，我知道有人買黃金白銀，係用嚟對沖「世界末日」嘅風險。不過，小弟嘅目標價係排除咗「世界末日」嘅可能性。因為如果我嘅目標價，係以世界末日為出發點，我係唔會用美元作為目標價單位，而係會研究，究竟要用幾多盎斯白銀，先至可以買到一張乘搭諾亞方舟嘅船飛囉。
第二、冠一兄又話過：「金價通常是銀價的50倍，如果10年銀價見120美元，那麼黃金豈不…？」冇錯，如果黃金價格飛升至6000美元一盎斯，亦都真係會反映到世人普遍覺得「世界末日」即將降臨。不過，小弟可以同大家講，自羅馬帝國時代至十九世紀中，金價同銀價分別相差12至20倍，如果回到12倍差價，120美元一盎斯白銀，亦只會等如1440美元一盎斯黃金。同埋，小弟唔排除120美元一盎斯白銀，唔係反映世人覺得「世界末日」即將降臨，只係反映世人覺得「美元/帝末日」即將降臨。
最後想澄清，小弟係一個不折不扣嘅樂觀者，如果我係一個覺得會有「世界末日」嘅悲觀者，我就唔可以每一次蒲完吧之後，同自己講：「唔使驚，你下一次一定可以識到女仔。」所以，多謝冠一兄關心，不過唔使擔心！
孫柏文