聯儲局主席唔易做。正如蜘蛛俠話齋，能力愈大者，責任愈大也。全球幾十億人嘅財富，分分鐘可以因為聯儲局主席一個決定就蒸發晒，你都咪話責任唔大。不過唔知係巧合定係天意，連續三屆聯儲局主席都係一上任就要面對難關，今日新聯儲局主席伯南克上任後第一次主持，就等利世民同大家一齊溫故知新。
對上一任聯儲局主席格林斯潘，美國財金界當佢神咁拜。不過唔講大家可能唔記得，當年佢上任後，第一個挑戰就係87年10月19日嘅黑色星期一。當時佢用減息手段來「穩定經濟」，亦確立了聯儲局出手干預市場的先例。自此，美國財金界就認定每次市場出事，聯儲局都一定會救市。利世民就覺得，格林斯潘應該被稱為「有求必應財金界黃大仙」。
不過，評論界對格老睇法非常兩極化。有人認同格老嘅干預手段，認為佢積極介入，成功創造了十年的繁榮穩定；反對者就認為，格老太過受政治影響，有時不必要的救市行動，反而加劇咗過去幾次經濟周期的波幅，引發連串嘅經濟泡沫。
其實格老上任之前，美國人嘅偶像係沃爾克(PaulVolcker)。呢位人兄接手聯儲局時，美國正面對高達11.2%的極高通脹。沃爾克上任之後大刀闊斧地收緊聯儲局過度寬鬆嘅貨幣政策。經過為期三年嘅艱苦日子，結果成功控制通脹，配合埋美國總統列根的自由市場政策，美國經濟在83年重拾升軌。沃爾克87年交棒畀格老時，通脹已經控制響3%以下。
新科聯儲局主席伯南克最為人所知嘅，係佢一直提倡通脹目標設定（InflationTargeting），同埋佢對通縮（Deflation）嗰種近乎恐懼的抗拒。今次從格林斯潘接過瀕臨爆破嘅房產泡沫，係佢任內首項挑戰。
今次嘅兩難係︰加息，又怕篤爆個房產泡沫；減息，又怕再吹大個泡。市場雖然已經預咗佢會加息，不過大家睇緊佢仲有乜嘢講。今晚利世民會豎起耳仔慢慢分析，聽日再同大家拆局。
利世民