一聽見話食火鍋，靚女們必嗌︰「咁熱氣咁肥！」火鍋熱氣已成歷史！我知道有骨氣最近新出了火鍋湯底，以清熱解悶氣為主題，並標榜唔油膩，飲湯底就好似飲涼茶一樣。至於火鍋配料，用上酒樓點心做餡料，食火鍋又食到一盅兩件！表面九唔搭八，其實呢個先係創新配搭！
記者︰方綺君
攝影︰林栢鈞
model︰Phoebe、Winnie@Salvador
湯底起底
1綠茶桂花鍋$68
綠茶具抗氧化和消油膩的作用，又有兒茶素，可以促進新陳代謝，清除身體內的有害物質，預防癌症。桂花有香味，亦有利尿、解毒、平肝火的作用。成個鍋一滴油都無，怕肥又要keepfit嘅型男索女啱晒啦！
2花旗參西施骨鍋$88
用加拿大花旗參，味道較純，甘味較重，適合補肺降火，生津液除煩，虛而有火者相宜。醫學角度上能補充氣血，針對精力虧虛，貧血，體力下降等症狀。至啱做到無時停，體力透支的打工仔。
3冬瓜米鴨鍋$98
用2至3個月大米鴨，大約14至16両重，米鴨頸短、頭小、毛為啡色，胸特別肥厚，肉多骨細。冬瓜能除小腹水脹、利尿去濕，且能「益老耐老」，有顯著的健脾益氣消水的作用。長期食用冬瓜，可消除體內多餘水份，達到減肥目的。
4陳年花雕蟹鍋$168
花蟹在有20年的陳年花雕酒中浸5小時，讓花蟹吸味之餘又可保留鮮味，再蒸以保肉質鮮嫩。上菜會先上原隻花雕蟹，再用以花蟹煮成的精華加入上湯烹煮，香味5尺以外都聞到，入口啖啖酒香，唔會搶晒食物原有味道。
清熱湯料燥底最啱
我一向燥底，最好食一些清熱降火的菜式，最新推出的火鍋湯底就以清熱解悶為主題︰花旗參西施骨鍋、綠茶桂花鍋、冬瓜米鴨鍋及陳年花雕蟹鍋，每種湯底都有藥用功效，擦到飽之餘又可以做到養顏瘦身。你可能會話，冬天都過仲飲花雕？陳年花雕蟹鍋選用味道不會太濃的花雕酒，不太嚐酒的朋友都可接受。對現在乍暖還寒、陰陰凍凍的天氣其實最適合不過。
貴妃骨湯底清到見底
很多時食火鍋，不論叫甚麼湯底，唔係有一大層油浮面，就係湯底因太多材料而帶點混濁，有時真係幾倒胃口。不過今次相反，個個湯底用料十足，而且個個都清到見底，連花旗參西施骨鍋，最易出油的貴妃骨都無出事，原來廚師特別揀選肉多無肥膏的貴妃骨，煲起來湯底都會清啲，加上沸水過程等事前工夫去走大部份油份，於上菜前又會過濾湯底一次，難怪料多之餘仲可以保持清澈。
京都綠茶主打天然
至於綠茶桂花鍋，一樣清到見底，功勞全在用上上等日本京都綠茶葉炮製，少雜質泡出來的茶自然清，茶味亦較清香，顏色帶黃綠，沒有中國茶般味道苦澀。用綠茶葉雖然成本增多，但比起用綠茶粉，的確令湯底清澈，水沸時有天然的綠茶味。
最好食點心鍋料
鳳爪骨都食埋
我鍾意飲茶，但點都諗唔到食火鍋都可以歎到至愛的酒樓點心。師傅正正捉到香港人愛試新嘢嘅心態，我試過當中配料，最讚位一定係灌湯南瓜小籠包、上素水晶包及豉汁鳳爪餃。
灌湯南瓜小籠包：先將南瓜打成茸，過濾幾次直到清除所有雜質，才會加入麵粉做皮，再將剩下的南瓜茸和豬肉絞成肉醬，皮薄料多，絕無欺場。
上素水晶包：內有多種素菜，素菜粒粒大小相若，師傅吸乾水份避免素菜過多水份，認真細心。師傅咁好心機，當然都要畀心機食啦！
豉汁鳳爪餃：醃得夠晒入味，師傅亦特意保留少少軟骨，鳳爪餃落火鍋煮熟後不會過腍，依然有嚼勁。
食客兩句
有骨氣海鮮酒家
地址︰香港摩理臣山道84-86號
電話︰23121212
營業時間︰星期一至日
11:00am-3:00pm、6:00pm-2:00mn
