Esprit老闆邢李㷧噚日接受領袖獎，佢同靚靚老婆林青霞一齊出席頒獎禮。邢老闆盤生意年年賺大錢，但好謙咁話檔生意好細好細，細到傳媒都無興趣報道，如果唔係，點解有關佢嘅新聞都同佢檔生意無關。
唉，邢老闆，說話唔係咁講，你話福布斯全球十大富豪李嘉誠檔生意大定細吖？佢公布完業績之後嗰日，你估談論佢公司盤數嘅人多，定係談論佢話唔排除再婚嘅人多啲吖嗱？
除咗粉紅色新聞，其實邢老闆白手興家嘅創業經過又好值得後生學習，米高邢話自己紅褲仔出身，有乜困難未遇過，總之見招拆招。邢老闆近年遇到人生另一大挑戰，就係𠱁仔女食嘢。藍籌股老闆又如何，一樣「俯首甘為孺子牛」。
傳真︰2623-9278
電郵︰[email protected]