臨近期指結算，又見好淡大鬥法，股市走勢有如過山車。恒指最高去到15920，升過百點，但午後一下由期指帶動嘅俯衝而落，恒指反升為跌，最低15787，倒跌28點，尾市好友再鼓勇，掃番上去，埋單恒指總算仍有40點進賬，成交則大增到362億元，可見戰況係幾激烈。
萬六大關當前，要衝破，談何容易，特別係期指要結算，好淡仲要鬥多一兩日，市場才會明朗化。中資股大升後調整，市場觀望交通銀行（3328）業績宣布。中資股係今年投資主流，好消息不絕，有QDII、人民幣升值等，後市仲有排上。
北京首都機場（694）走勢呈強，高收4.575元，升0.125元，升幅2.8%，成交增至逾860萬股，大行買盤係主力。首機在4.2元至4.5元間整固已有個多月，近日股價重上3條短期平均線之上，MACD亦出現雙牛入貨訊號，升浪再起，短期可向5.0元水平推進。
首機本身已係基金股，大行近日仲不斷加碼，顯然志不在小。事實上，首機利好因素甚多，基金揸重，睇長線一兩年後嘅股價，好大機會坐六望七。
擴建機場迎奧運
內地航空交通日趨繁忙，首機係獨市生意，盈利只會升，唔會跌。機場收費方面，中國民航總局正檢討中，新的安排對首機有正面影響，花旗美邦報告就估計首機盈利可增加10%至15%。
另一個有利因素，係首機目前正進行擴建，以配合北京舉辦08年奧運所出現的空運需求。現時首機1號樓和2號樓的設計客量係3500萬人次，而去年客運量已達4100萬人次，估計08奧運年的客運量會上升至6100萬人次。首機第3期擴建工程明年底完工後，機場吞吐能力將可適應至2015年的航空市場需求，首機亦會成為亞洲主要樞紐機場。
05年（12月結）的上半年，首機獲利4億元（人民幣．下同），升17.3%，估計全年盈利8.5億元，每股盈利0.22元；06年可上升至0.27元，07年估達0.33元，以獨市生意及基金股來衡量，PE20倍唔算貴，則一年目標價可見5.4元至6.6元。
郭兆誠