牛肉麵，頂呱呱，味道確唔同，營養又唔差！」相信有番咁上下年紀嘅男士，可能都會聽過呢句招牌Slogan，佢就係《筋肉人》當年喺香港播映嗰陣入面嘅口頭禪；雖然嗰碗擺到明其實就係吉仔牛肉飯。過咗咁耐佢終於喺街機出現，玩法唔單止係打摔角咁齋，仲加入咗幾濃厚嘅3D格鬥色彩㖭！嗰啲誇張到甩轆嘅大招真係令人回味無窮！
文：陳福榮
攝影：何家亮
鳴謝：金星機地（尖沙嘴加拿芬道20號地下）
《筋肉人》延續篇《筋肉人二世》響日本仍有漫畫連載，仲有卡通片做緊，所以遊戲無可避免會以新呢輯加上二十幾年前嘅經典老鬼組合而成。主角筋肉人同佢個仔筋肉萬太郎固然揹重飛，嗰啲眾所周知嘅著名超人如泰利、羅賓面具男、拉麵男、戰鬥機械、水牛人同阿修羅等當然有得用，再加上一班「二世」活躍分子構成角色陣容。招式方面，都算依足原作嚟做，例如筋肉人父子招牌摔技「筋肉Buster」或者戰鬥機械嘅屈辱招「BaroSpecial」都一一有齊，動漫Feel真係好足！
勁招全部計Level
雖然佢係摔角作品，但並非任何時候都可以出到原著入面嘅勁招，玩家要先打擊命中對手或者被人打中，咁先至可以令TensionGauge逐格慢慢儲，最多可以儲到9格。而每個角色都有十幾招必殺技，有啲係摔技而有啲係破壞力好強嘅打擊技，佢哋都係需要消耗Tension能量，愈勁嘅招所用嘅Tension就會愈多，換言之勁到爆廠嘅超必就肯定係用足9格喇。咪以為必殺技好易咁，因為對手係可以擋格你啲招，9格能量隨時會因對方一擋而化為烏有，甚有「買得大賠得大」之感！
拳腳交駁撻招威力大
為迎合街機客口味，《筋肉人》打鬥時嘅重點放多咗喺平時嘅打鬥招式上，除咗用嚟儲Tension外仲可以扣到唔少血，無他嘅，如果下下都玩摔技捉實唔放，節奏感自然差啲。拳腳交都幾《鐵拳》Feel下，不單止打中人會硬直可以係咁連招，仲可以靠浮空技「浪」起對手係咁𡁻，打得靚嘅話一嘢扣人4都唔出奇，咁樣玩起來都算OK爽快嘅。
測試評分
其實《筋肉人》玩咗都有十幾二十年，由紅白機幾低B嘅玩法、非常正經嘅打摔角到𠵱家好鬼《鐵拳》Feel都有，但以街機客路嚟講呢個題材始終比唔上《龍珠》咁經典，同樣動漫改編佢真係輸蝕啲。加上畫面唔夠Sharp，霎眼以為自己玩緊PS2！
同之前PS2、PSP版相同，都係由擅長開發摔角類型嘅AKI負責，佢仲整過響美日都大受好評嘅音樂格鬥系列《DefJam》，因此風格上都頗為一脈相承。然而成個《筋肉人》系列角色多過乜，今次選角上只係揀咗最主要嗰批，一啲都幾值得落嘅超人都唔見影，唔通想留番第二集或者家用版至加入去？
筋肉評語
PROFILE
遊戲類型：格鬥
對應機種：街機
遊玩人數：1-2人
售價：$3一局
(C)Yudetamago
集英社．東映動畫．東京電視台
(C)Banpresto2006
