中半山堅尼地道一幢四十幾年嘅舊樓,啱啱有個單位以超高呎價成交,比市價高出一成半。呢幢大廈喺34A號,唔算出名,不過業主當中就有一個好出名,佢就係前港姐朱玲玲嘞。
世紀21中半山分行經理張禮話,個盤高價成交肯定唔係名人效應,同朱玲玲亦無關,因為個買家係外國人,唔識港姐。佢只係鍾情單位望香港公園全景,加埋內櫳裝修靚,所以不惜高價買入。呢個單位2500呎,成交價2180萬,每呎8720蚊。原業主86年以153萬買入,揸咗20年,升值超過13倍,勁賺過2000萬。
講番呢幢名不經傳嘅大廈,樓高12層,只有12伙,過去5年都冇成交,對上一宗喺01年,頂樓單位以1100萬易手,再之前就喺朱玲玲同屋企人買入嗰間連平台單位,面積都係2500呎,佢哋99年以1100萬買入,近年一直出租。
聽講𠵱家每月租緊8.5萬,租期到08年,要買都有得傾,連租約叫價3300萬,呎價超過13000蚊,如果成功賣出,升值兩倍,賺2200萬;就算賣唔出,回報率超過九厘,當長線投資都唔錯。
電郵地址:[email protected]