作為好多優秀黑幫電影嘅啟蒙作，《教父》不經不覺已經推出咗有卅幾年，而攞正牌同佢致敬嘅官方遊戲亦啱啱面世。咪睇呢隻嘢似足《GTA》七八分就以為冇料到，佢唔單止好啱電影狂熱者玩，就算當獨立一集Game嚟睇亦都有板有眼，令人更容易感受到四十年代紐約市嘅黑道風雲，四大家族互片嘅濃郁劇味。
文：陳福榮
故事主線 電影咁長
今次《TheGodfatherTheGame》可謂與其他《GTA》系暴力Game有啲唔同，由於《教父》呢個著名電影系列歷久不衰，EA宣布將佢改編成遊戲固然係明智商業考慮，但掉番轉諗亦徒添風險，始終佢嘅忠實擁躉，甚至一般用家唔多唔少都對呢套片有一定認識，絕對唔容許有求其濫製嘅情況出現。
好彩佢都算做得唔差，至少主線劇情夠長唔會太易爆機，更重要係好多地方都依足電影嚟做，令人有更深刻嘅親切感。而玩家所操控嘅主角雖然係電影冇嘅虛構人物，不過玩起嚟卻起着舉足輕重作用，佢會幫馬龍白蘭度扮演嘅DonVitoCorleone嗰個幫會逐步擴張勢力，最終成為紐約一哥，真係名副其實嘅無名英雄。
做個老外蠱惑仔
故事就講到主角老竇係俾敵對黑幫射殺，佢阿媽趁聚會懇求「賊阿爸」Corleone家族接收咗佢，結果就跟隨幫中長輩學習點至做到一個成功嘅幫會成員。起初職責都係去收吓保護費咁，啲店主當然唔會理你呢個嘍囉，不過經隨便搗亂甚至施予適量暴力之後，就會受到注意人人畀面，而且不斷解決事件提高名聲值仲可以升Level學新招㖭！想霸晒紐約市做大佬，就要將鄰近東河同赫臣河嘅幾個地方搶到手，途徑包括擴張業務勢力、盡量侵佔地盤、整頓所有倉庫以及解決阻頭阻勢嘅對頭家族，而且新澤西一帶都係油水區，但包含「小意大利」、「地獄廚房」同「中央鎮」嘅曼哈頓就更係兵家必爭之地，好多任務都係喺呢度發生。
長短火汽油彈用齊
由於充份利用咗電影版權嘅優勢，唔少名場面都係跟足電影嚟做，就連Sonny俾人亂槍埋單嗰幕經典都有，換言之對喜歡呢套戲嘅人就有莫大投入感。所以武器方面都好鬼四十年代懷舊Feel，主要都係左輪手槍、散彈槍同卡邦式機關槍等，再加埋偷襲敵陣專用嘅汽油彈，絕對唔會有格格不入感覺。用槍嗰陣，主要嘅射擊模式係半自動鎖定目標方式，如有需要可切換成FPS玩法，適合唔同人士喜好，再者除咗呢批架生，佢亦都預咗玩家拳打腳踢啲唔順眼嘅人，有時仲可以出到令人痛不欲生嘅「處決技」㖭。
測試評語：想玩靚版要等多陣
整體做得幾好，不但滿足到鍾意玩《GTA》嘅客，連普羅戲迷口味都照顧到！馬龍白蘭度個樣真係做得好似，加埋原汁原味配音，呢點係比其他同類遊戲出色。據知遲啲會出PSP同XB360版，前者玩法可能會有啲改動，手提機嘛！後者畫面一定靚爆！不過影期就要等吓！
PROFILE
機種：PS2、XBOX、PC
類型：ACT
人數：1人
發售日：發售中
(C)2006ElectronicArtsInc.Trademarksbelongtotheirrespectiveowners.Allrightsreserved
