好多人狠批時下年輕人淨係識飲酒、賭波、唱K同打機，玩都玩得無文化，其實又未必啱晒喎！我啱啱去博物館睇完展覽，發覺古人玩嘅嘢其實同我哋差唔多，一樣離唔開打波、唱歌同劈酒。今次展覽有115件中國古時消閒玩意，正在唔係齋睇咁悶，仲可以拎上手玩，雖然玩得嘅都係仿製品，但可以扮吓古人打Golf，你都咪話唔過癮！
記者：許維雅
攝影：何家亮
模特兒：Yannie（Salvador）、Andrew
展出115件珍貴文物
一連五Day返工等收工，捱到星期六日正常人都會玩餐飽，所以話娛樂活動最睇到一地文化。問心，你放假玩乜？斷估唔係篤波碌齡，就係打機上網唱K，再唔係就賭波攻打四方城，好多人話年輕一代吃喝玩樂無文化，查實No喇，因為歷史學家話畀我哋聽，古人娛樂都離唔開打波賭錢同唱歌咋！香港文化博物館全新「雖小道、亦可觀──中國古代消閒娛樂」展覽，展出樂器、樂俑、舞俑、磚畫、博弈器具、雜技、競巧遊戲、球類及狩獵活動等115件過百年歷史文物，大部份文物更由中國國家博物館借出，超珍貴！何況文物通常都眼看手勿動，今次難得可以拎上手玩，科$10走番轉實在超值。
運動組
音樂組
賭博組
Golf唔係鬼佬玩意
古人玩運動唔奇，奇就奇在中國老早已經有Golf呢種鬼佬玩意，當時叫「捶丸」，除「捶丸」外還有類似足球（有無開波盤？）、馬球（高尚玩意喎！）等運動，全部有圖為證，雖然比賽用具、玩法同𠵱家好唔同，不過一樣睇得出古人好有頭腦，諗得出N咁多款玩意運動。
中國樂器千變萬化
古裝片經常出現舞樂場面，𠵱家後生一輩只顧聽流行曲，對中國古樂提不起絲毫興趣，其實中國音樂一向千變萬化，絕對唔止古琴、古箏、琵琶呢類木製樂器，古人仲會用金屬、絲、土、革、泥、石等8種唔同物料製成樂器，變化出唔同音樂，問你服未！有得落手試喎，歡迎你隨時入場露兩手。
劈酒玩銅投壺
邊個民族最嗜賭？中國人認第二，無人敢認第一！中國人好哋哋劈酒都要猜番板「銅投壺」比試一番，唔猜番三兩板先唔安樂，賭博心態顯而易見。睇古裝片賭坊場景經常出現，咁你又有無見過真正嘅古代骰仔同骰盅？以前猜乜枚嘅呢？潮流興翻叮，𠵱家古老當時興，參觀完展覽話唔定你會發現啱玩新枚，下次劈酒就唔使玩嚟玩去都係十五二十、大話骰咁Q悶啦。
「雖小道、亦可觀——中國古代消閒娛樂」展覽
地點：沙田文林路1號香港文化博物館
日期：即日至6月26日（逢星期二休息）
時間：周一至周六10:00am-6:00pm、周日及公眾假期10:00am-7:00pm
入場費：$10，長者、殘疾人士及學生半價，逢周三免費
電話：21808188
文化人的「四頭家」
$10入場費十分抵玩，除文物外，亦可順道參觀「融——四頭家」展覽。展覽由「住好D」創辦人楊志超策劃，胡恩威、夏永康、葛民輝及陶傑4位唔同範疇嘅文化人分別設計佢哋獨有諗頭嘅「家」。抵玩嘢陸續有嚟，入場券奉送1袋棋子，做乜？反轉場刊就可兒時玩意步行棋棋盤，科$10就可以有得拎有得玩有嘢睇，仲抵過買盒出奇蛋。