呢幾日天氣陰陰濕濕，搞到人好鬼懨悶，打畀友人S君吹水解吓悶，點知佢仲呆過我。原來喺同我講電話之前，打咗去3香港CS問嘢，但係就等到佢發晒吽豆。事緣佢買咗部有PTT功能手機，聽講話玩PTT要JoinPlan喎，於是打落台問啦！第1位CS姐姐話要Check吓先，S君聽住黎生隻歌等咗兩分鐘，返嚟嘅答案係有呢類Plan但只限港澳區；S君就覺得奇怪喇，因為之前有個Friend提過，話去外地都用得喎！CS姐姐再叫佢等等幫佢Check清楚，又聽咗黎生隻歌兩分幾鐘，CS姐姐話轉駁畀另一位同事，話嗰邊啲同事會清楚啲，S君又再等；等已經係問題，最慘係要迫佢聽黎生隻歌，仲要播嚟播去都係嗰隻，懨悶到爆！
如是者等咗5Round，佢終於得到答案係外地都玩得，S君忍唔住爆咗句：「一時話無，一時話有，我信邊個好呀？」嗰位CS哥哥又好鬼客氣咁沙晒冧，話會Update番啲同事，搞到S君咁亂真係唔好意思等等，道歉說話足足講咗成10秒。其實S君話佢已經等到吽晒，加上嗰位哥哥咁好語氣，仲邊會有火氣呀，呢啲咪係真正嘅服務態度囉！
3月27日 心情：發呆