港股近排走勢古靈精怪，照睇係同期指大戶大撼大有關，繼上周三下午3點後有期指大沽盤質低港股279點後，昨日3點過後卻出現期指大買盤挾淡倉，即月期指大升175點，亦帶動恒指上升99點。
有老友話應該同歐資行有關，因為這是當地開市時間，趙飛雲則覺得未必有關，反而時間性較重要，大戶離收市前一個鐘頭做嘢，應該效果最好，只要攻勢夠猛，擺出一副必贏咁嘅款，一般散戶或小投機者面對快將收市的壓力，意志好容易被摧毀，爭先恐後止蝕離場，借力打力增添對手壓力。此外，攻勢維持一個鐘頭當然遠比維持2-3個鐘頭易得多。
中資股昨日午市又癲過，有個股友同趙飛雲講，話好多中資股買盤來自中銀證券，情況唔簡單，應該係春江鴨行動。趙飛雲真係唔識點回應，但就諗起長實（001）去年投地，亦曾經搵個外國人嚟舉牌，股友咁諗法好似有啲一廂情願，祝佢好運啦。
趙飛雲反而覺得早市大戶似係托住期指沽現貨，感覺就唔多好，同時新任聯儲局主席伯南克對利率前景點睇，大家都係靠估，議息前大舉入市，點計都唔化算。
港股午市挾淡倉炒上，倉內股票反而逆市回軟，百威（718）更跌穿5日線（0.24元）的計數位，按部署在0.239元沽出計數。另一隻百仕達（1168），早市高見2.825元，最後跌回2.75元收市，跌0.025元或1%。百仕達暫時仍守在5日線（2.70元）之上，仍繼續持有。
玉皇朝睇位翻兜
沽出百威後，倉內只持有一隻百仕達，待看完議息結果後，會有幾隻股份提供給大家參考。
另外有些早前炒過的股份，如麗豐（1125）、麗國（488）及玉皇朝（970）等已跌至20日線的關鍵位，守得穩將有反彈。
趙飛雲