禮拜六晚，孫柏文同班朋友劈完酒之後，又再一次一支公返屋企。孤零零又wingwing哋咁坐喺部電腦前面，開吓已經唔係好流行嘅網上短訊程式ICQ，睇吓有冇失蹤咗嘅女性朋友蒲頭，跟住用隻金手指同佢哋溝通、溝通。其實，今時今日嘅香港，如果你同啲後生仔女講交換「ICQ號碼」。撞正識少少科網歷史嘅後生仔女，佢哋都只會笑你「乜咁out㗎」。撞正啲唔識科網歷史嘅後生仔女，佢哋就分分鐘會問你ICQ係唔係Telex或者電報年代嘅一種通訊技術。
其實，我喺花旗國大學讀緊書嘅時候，開始用ICQ，差唔多都有十年囉。當時，ICQ如日方中，稱霸網上短訊世界。網上短訊程式好唔好用，決定於有幾多人用緊，因為愈多人用嗰隻短訊程式，你就可以透過佢同愈多人傾偈。如果畀一個短訊程式你，冇其他人用，更好用都冇用，因為冇其他人，傾唔到偈。呢一個現象，就係叫做「市集效應」（MarketplaceEffect）。
市集效應都可以靠唔住
喺古代，一個市集要成功，就要人流高。正當買家賣家都人頭湧湧，買方知道呢個市集有全城最多賣家競爭，就會相信到該市集會搵到最低嘅價錢。掉番轉頭，賣方如果知道呢個市集有全城最多買家出價，就會相信到該市集會搵到最高嘅價錢賣貨。
最後，愈係旺嘅市集就會愈旺，愈冷清嘅市集就會愈冷清，直至到個市集人多到迫爆，就會見到有啲貨品嘅買賣雙方，自自然然咁去其他地方做交易。去至今時今日，二十一世紀，喺虛擬世界係唔會有「迫爆」，所以如果你有一個全城最旺嘅「市集」應該只會愈做愈旺。不過，就算有更旺嘅「市集」，如果唔用心去管理，買賣雙方遲早會走去其他「市集」。我今日用ICQ搵唔到朋友，代表ICQ嘅沒落。ICQ嘅式微就係一個好好嘅例子，ICQ後來被花旗國AOL買咗，AOL又跟住同埋時代華納合併。最後科網爆破，ICQ變成棄嬰，ICQ愈來愈唔好用。一個唔用心去管理嘅「市集」，就算可以靠「市集效應」稱霸世界，都可以玩完。
孫柏文